Liberalizimi i vizave për Kosovën, ambasadorët e Bashkimit Europian japin dritën jeshile, Kurti: Meritë e qeverisë

Ambasadori i Gjermanisë në Kosovë, Jorn Rohde reagoi sot për vendimin e Këshillit Evropian që të fillojnë negociatat për liberalizimin e vizave për Kosovën.

Rohde, në një postim në rrjetin social “Twitter”, shkruan se Gjermania është angazhuar fuqishëm për një vendim të tillë.

“Më në fund. Një vendim i tej zgjatur për të cilin Gjermania ka  fuqishëm”, ka shkruar Rohde.

Komisioni Europian nga viti 2018 ka rekomanduar heqjen e vizave për Kosovën, duke thënë se i ka përmbushur të gjitha kushtet. Por, procedura kishte ngecur në Këshill.

 Sot kur kaloi edhe në këtë fazë, kryeministri Albin Kurti ka marrë meritat për këtë sukses.

“Ky vendim është njohje dhe konfirmim i përkushtimit tonë për sundimin e ligjit, luftën kundër korrupsionit, forcimin e kontrollit kufitar dhe menaxhimin e migrimit. Kriteret teknike vërtetë ishin plotësuar tash e një kohë të gjatë, për çka i jemi mirënjohës administratës shtetërore. Por ishin kërkesat për sundim të ligjit, luftim të krimit dhe korrupsionit dhe respektim të institucioneve të pavarura që nuk përmbusheshin dot. Pengesë ishte edhe imazhi jo i mirë i vendit, për shkak të aferave korruptive, kulturës së mosndëshkueshmërisë dhe migrimit masiv e ilegal drejt vendeve të zonës Schengen”, ka shkruar Kurti në Facebook.

Kurti tha se disa punë të Qeverisë së tij kanë përmirësuar imazhin e Kosovës.

“Rritja ekonomike dhe e vazhdueshme; renditja në vend të parë për sundim të ligjit në Ballkanin Perëndimor për dy vite radhazi sipas Ëorld Justice Project; përmirësimi për 17 vende në indeksin e perceptimit të korrupsionit të Transparency International; përmirësimi për 17 vende në indeksin e Reporterëve pa Kufij për lirinë e mediave; politikat sociale të rishpërndarjes me Pakon e Ringjalljes Ekonomike dhe atë për Përballje me Inflacionin; rreshtimi me botën demokratike dhe qeverisja e mirë dhe e pastër ka ndryshuar rrënjësisht imazhin e Kosovës”.

Për këtë, ai ka thënë se falënderon qytetarët, sepse “vendimi i sotëm është fillimisht meritë e juaja ngase vetëm ju mund të ndryshonit imazhin e vendit tonë duke ndryshuar qeverinë përmes votës dhe qeverisjen përmes pritshmërive”.

Kreu i grupit parlamentar të Partisë Socialiste, Taulant Balla reagoi sot për vendimin e Këshillit Evropian që të fillojnë negociatat për liberalizimin e vizave për Kosovën.

 “Edhe pse shumë i vonuar, lajmi i mirë vjen nga Këshilli Evropian ku është rënë dakord që të fillojnë negociatat për liberalizimin e vizave për Kosovën. Sipas vendimit, lëvizja pa viza për qytetarët e Kosovës do të jetë e mundur kur të hyjë në fuqi sistemi evropian i udhëtimit, ETIAS, dhe data për këtë është 1 nëntori i vitit 2023. Dhe në rast se do të ketë vonesa për këtë sistem, liberalizimi i vizave për Kosovën do të hyjë në fuqi jo më vonë se më 1 janar të vitit 2024. Ky është vërtet një lajm i mirë! Më në fund ka një datë finale”, theksoi Balla në një postim në rrjetet sociale.