Studimi: Mbi 2/3 e të rinjve synojnë largimin! Ambasadori britanik: Japim grante për të rinjtë që hapin biznese në zonën e veriut

Më shumë se dy të tretat e të rinjve vazhdojnë të synojnë largimin nga Shqipëria. Të dhënat u bënë publike nga ambasadori  Alastair King-Smith, i cilu iu referua studimit te fundit nga Këshilli Britanik (British Council)

“Shumë të rinj, veçanërisht nga veriu mendojnë se mundësia e vetme dhe më e mirë është ta lënë Shqipërinë dhe të udhëtojnë në mënyrë të paligjshme në Mbretërinë e Bashkuar. Pjesërisht, kjo është pasojë e ndikimeve sfiduese të pabarazisë së zhvillimit, në të gjithë vendin”.

Ambasadori britanik Alastair King-Smith teksa gjendej në Shkodër për Festën e Çajit, tha fondet do të shkojnë për qarqet Shkodër, Kukës dhe Dibrës.

“‘Perspektivat e Reja’ do të vazhdojë të japë më shumë rezultate këtë vit. Mbi 2500 persona do të përdorin Qendrat e Sipërmarrjes Rinore që kemi ngritur në Kukës, Has dhe Tropojë. Do të japin 30 bursa profesionale për kurset e gastronomisë dhe IT-së. Punësim për udhërrëfyes për 150 të rinj, mentorim për 220 aspirantë për sipërmarrës për të rritur bizneset e tyre dhe grante që arrijnë në 120.000 paund për bizneset mikro dhe ato të vogla”.

Gjithashtu këtë vit do të hapen qendra multimediale në disa shkolla për të ndaluar dezinformimin dhe për të fuqizuar mediat lokale. Ndërsa në universitetin e Shkodrës do të hapet programi “Future English”, duke u ofruar studentëve mësimin e gjuhës e angleze pa pagesë.

SI.E./I.M/Shqiptarja.com

TAG:
• Alastair King-Smith
• Shkoder
• emigrimi drejt Anglise