Ambasadori i Shqipërisë në Këshillin e Sigurimit: Masakra e Buchas tregon fytyrën e Putinit! Rusia ka nënshkruar memorandume që duhet t'i respektojë

TIRANË- Masakra me civilët në Bucha të Ukrainës tregon fytyrën e vërtetë të agresorit rus Vladimir Putin. Kështu është shprehur ambasadori i Shqipërisë Ferit Hoxha në fjalimin që ka mbajtur në Këshillin e Sigurimit në OKB. Në ditën e 42-të të luftës, ambasadori Hoxha tha se Rusia nuk e arriti ëndrrën e saj perandorake për të marrë Ukrainën por ka ngecur në vend, duke theksuar se Kievi arriti t’i zmbrapste forcat ruse.

“Rusia ka ngecur dhe ëndrrat e saj perandorake nuk janë askund; marrja e Ukrainës doli më në fund e pamundur; Kievi ishte shumë i vështirë për t'u gëlltitur. Ushtria ruse është në rrëmujë, por nuk i ka ndalur goditjet dhe bombardimet”, tha Hoxha në Këshillin e Sigurimit në OKB.

Hoxha ka komentuar edhe deklaratat e Moskës se fotot e civilëve të vrarë në Bucha janë inskenime. Ai tha se me këto deklarata Rusia mund tu mbyllë gojën mediave vendase, por imazhet satelitore dhe gazetarët e pavarur në terren tregojnë qartë që Bucha është një varrezë në qiell të hapur.

“Ju mund tu mbyllni gojën mediave në shtëpi, por nuk mund të mashtroni imazhet satelitore, nuk mund të verbëroni gazetarët e pavarur dhe OJQ-të e të drejtave të njeriut në terren”, u shpreh ambasadori.

Ndalur sërish në masakrën ruse, Hoxha tha se Rusia ka detyrim ligjor ndërkombëtar të respektojë të drejtën ndërkombëtare humanitare, ligjet e luftës, duke përfshirë Konventat e Gjenevës të vitit 1949. Ambasadori theksoi se Rusia ka detyrim t'i përmbahet urdhrit të Gjykatës Ndërkombëtare të Drejtësisë për të ndaluar menjëherë aktivitetin e saj ushtarak në Ukrainë. Hoxha tha se Rusia nuk e ka zbatuar këtë detyrim, por kjo sipas tij nuk do të thotë që ushtria ruse dhe komandantët e saj do t’i shpëtojnë përgjegjësisë.

Fjalimi i plotë i ambasadorit Ferit Hoxha në Këshillin e Sigurimit në OKB

Kjo është mbledhja e 14-të e KS për Ukrainën që nga 31 janari, ndërkohë që lufta ka hyrë në muajin e dytë. Le të theksojmë disa fakte të thjeshta por domethënëse: Rusia ka ngecur dhe ëndrrat e saj perandorake nuk janë askund; marrja e Ukrainës doli më në fund e pamundur; Kievi ishte shumë i vështirë për t'u gëlltitur. Ushtria ruse është në rrëmujë, por nuk i ka ndalur goditjet dhe bombardimet. Kjo nuk është as e re dhe nuk është lajm. Lajmi i vërtetë që ka tmerruar botën është se çfarë Rusia po lë pas, tmerret e patregueshme, ato imazhe tronditëse në zonat nga të cilat Rusia po tërhiqet: Imazhet e civilëve të ekzekutuar me një plumb pas koke,  ndonjëherë me duar të lidhura pas shpine ose të vrarë mbi biçikletë; imazhet e varrezave masive të tejmbushura me kufoma. Imazhe amsakrash dhe shkatërrimesh, përfshirë shtëpitë e plaçkitura, përdhunime dhe dhunë seksuale janë akte që u atribuohen vetëm banditëve. Ato burojnë nga të njëjtat impulse mizore si bombardimet e qyteteve, shtëpive, spitaleve, shkollave dhe kopshteve nga forcat ruse. Bucha është një varrezë në qiell të hapur, fytyra famëkeqe e agresionit rus.

Znj. Presidente, E kemi dëgjuar herë pas here: nuk është Rusia! Jo! Do të jetë e vështirë, në të vërtetë e pamundur, të bindësh ndokënd se tanket e shkatërruara që rrëmojnë rrugët, minat dhe kurthet e lëna pas mes rrënojave dhe trupat e civilëve të vrarë nga ekzekutimet arbitrare dhe të shtrirë në rrugë mes mbeturinave, janë imazhe të inskenuara për propagandë. Kush beson se Rusia sulmoi Ukrainën thjesht për të mbrojtur civilët, ndërsa Ukraina është e zënë me inskenimin e filmave horror? Ju mund tu mbyllni gojën mediave në shtëpi, por nuk mund të mashtroni imazhet satelitore, nuk mund të verbëroni gazetarët e pavarur dhe OJQ-të e të drejtave të njeriut në terren. Të presësh që Rusia të pranojë dhe të thotë të vërtetën, është sikur të presësh që të vijë Godot. Ai nuk vjen asnjëherë! Këto janë fakte, prova të rënda dhe të pështira të mizorive të kryera, fytyra e shëmtuar e kësaj çmendurie. Krime të tilla, të dokumentuara nga HR Watch dhe të verifikuara nga gazetarë profesionistë të pavarur dhe të respektuar, ata që janë të ndaluar për rusët, kërkojnë përgjigje, hetime të plota, përgjegjësi efektive, drejtësi.

Kryeministri Rama i quajti këto krime “dhimbje të tmerrshme dhe turp i patolerueshëm” Rusia ka një detyrim ligjor ndërkombëtar të respektojë të drejtën ndërkombëtare humanitare, ligjet e luftës, përfshirë Konventat e Gjenevës të vitit 1949, Protokollin e Parë Shtesë. Rusia ka detyrimin t'i përmbahet urdhrit të GJND-së për të ndaluar menjëherë aktivitetin e saj ushtarak në Ukrainë. Por, për fat të keq, Rusia ka bërë një zgjedhje tjetër, të mos respektojë asnjë prej tyre dhe ka përjashtuar veten nga e drejta ndërkombëtare. Por ligji do ta ndjekë. Ushtria ruse dhe komandantët e saj nuk mund t'i shpëtojnë përgjegjësisë. Në rrënojat e qytetit është gdhendur emri i “Kasapit të Mariupolit”, një kriminel që ka bërë hi një qytet të tërë dhe i ka bërë qytetarët të shkojnë nga 3 vakte në ditë në mezi 3 vakte në javë. Kjo është arsyeja pse ne do të mbështesim thirrjen për të pezulluar pjesëmarrjen e Rusisë në HRC. Rezoluta e OKB-së që krijoi Këshillin, përcakton se "anëtarët e Këshillit do të respektojnë standardet më të larta në promovimin dhe mbrojtjen e të drejtave të njeriut". Standardet e Rusisë janë të neveritshme dhe prania e saj atje është një farsë, një përdhosje e vendit që duhet të jetë shenjtërorja e të drejtave të njeriut.

Të dashur kolegë, Rusia ka njoftuar se tani do të zhvendosë fokusin e saj në Ukrainën Lindore. Kjo do të thotë se ajo do të përqendrojë brutalitetin e saj atje, në atë që mund të përfundojë në një luftë gërryese. Rusia ka bllokuar rinovimin e misionit vëzhgues ndërkombëtar të OSBE-së në Ukrainë. Kjo i mohon komunitetit ndërkombëtar sytë e pavarur që i duhen atje. Kjo paralajmëron, mjerisht, më shumë luftë, mizori të mëtejshme, krime të tjera, edhe më shumë fatkeqësi humanitare. Kjo luftë vazhdon të prekë veçanërisht gratë dhe fëmijët. Miliona janë zhvendosur, shumë prej tyre vetëm, në kërkim të sigurisë. Është zemërthyese të shohësh nëna që shkruajnë emra dhe adresa në shpinën e fëmijëve të tyre, në mënyrë që ata të njihen në rast se përfundojnë jetimë. Ne mirëpresim përpjekjet e OCHA dhe partnerëve të saj për të ofruar ndihmë, në mbështetje të njerëzve në Ukrainë dhe milionave refugjatëve në vendet fqinje.

Zonja Presidente, Më lejoni të përfundoj me këtë shënim: rrallë herë rezultati i një lufte ka qenë kaq katastrofik në kundërshtim të plotë të asaj që donte të arrinte. Ushtria ruse është mposhtur nga rezistenca ukrainase e nën-pajisur në armë dhe njerëz; Rusia është e izoluar si kurrë në historinë e saj; është bërë vendi më i sanksionuar në botë ndonjëherë në histori. Asnjë vend nuk e ka parë ndonjëherë veten të transformohet, në vetëm 10 ditë, nga një aktor global në një paria financiare dhe ndërkombëtare. Deri në atë pikë sa është e detyruar të gjejë ngushëllim në mbështetjen e Koresë së Veriut dhe Sirisë.

Të dashur kolegë, Ky agresion dhe disfata e tij befasuese kanë ndarë një herë e përgjithmonë fatet e ukrainasve dhe rusëve. Sepse rasti i Ukrainës është gjithashtu kauza e demokracisë kundër tiranisë dhe kleptokracisë. Është një luftë midis vullnetit të njerëzve kundër vullnetit vicioz të një personi, veprimet e pamatura të të cilit kanë sfiduar gjithçka që ne mbështesim dhe që është drejtpërdrejt përgjegjës për çregullimin ekonomik dhe pasigurinë ushqimore që po prek të gjithë botën. Ai mund të zgjedhë të ndalojë, të tërheqë trupat dhe të largohet nga Ukraina, ose të vazhdojë të zbresë në humnerën që ka hapur dhe të përballet me pasojat.

SI.E./Shqiptarja.com

TAG:
• Ferit Hoxha
• OKB
• rusia sulmon ukrainen
• Këshilli i Sigurimit i OKB