Armëpushim apo pauza humanitare? OKB ende pa asnjë vendim për ndalimin e sulmeve të Izraelit në Gaza

Gjatë një vizite në Moskë të premten, një anëtar i një delegacioni të Hamasit tha se grupi nuk do të lirojë robërit e marrë gjatë sulmeve të 7 tetorit në Izrael derisa të arrihet një marrëveshje armëpushimi.

Lajmi vjen ndërsa Këshilli i Sigurimit i Kombeve të Bashkuara përpiqet të marrë në vendim nëse do të vendosë një armëpushim apo një pauzë humanitare që lejon kalimin e ndihmave për popullsinë e rrethuar të Rripit të Gazës, kryesisht për shkak të dallimeve politike midis anëtarëve.

Të mërkurën, Rusia dhe Kina vendosën veton ndaj një rezolute të Shteteve të Bashkuara që bën thirrje për një “pauzë humanitare”. Ata donin një “armëpushim”, një opsion i propozuar dy herë nga Rusia, të cilit iu vendos vetoja nga Mbretëria e Bashkuar dhe SHBA, të cilat mbrojnë Izraelin nga veprimet e Këshillit të Sigurimit, raporton Al Jazeera.

Javën e kaluar, SHBA vuri veton ndaj një rezolute të hartuar nga Brazili për “pauza humanitare”, duke argumentuar se i duhej kohë për përpjekje diplomatike në terren. Sipas Zyrës së Kombeve të Bashkuara për Koordinimin e Çështjeve Humanitare ( OCHA ), më pak se 70 kamionë janë lejuar të hyjnë në Gaza nga vendkalimi Rafah me Egjiptin që nga e marta mbrëma, një pikë në oqean.

Palestinezët në Gaza janë privuar nga ushqimi, uji dhe ilaçet, veçanërisht pasi Izraeli njoftoi një rrethim të plotë në enklavë, duke bllokuar hyrjen e të gjitha furnizimeve thelbësore përpara dërgimit të ndihmave të fundit. UNRWA, agjencia kryesore e OKB-së në Gaza, të mërkurën paralajmëroi se do të detyrohet të reduktojë operacionet e saj në Rrip nëse karburanti nuk lejohet.

Ndërsa Këshilli i Sigurimit ngec, Asambleja e Përgjithshme e OKB-së do të votojë mbi një projekt-rezolutë të premten nga grupi arab, i cili bën thirrje për ndihmë të pakufizuar humanitare. Udhëheqësit e Bashkimit Europian gjithashtu do të përpiqen të gjejnë një pikë të përbashkët në Bruksel megjithëse pozicionet në bllok ndryshojnë shumë.

Pra, cilat janë ndryshimet në fjalët për të cilat kombet e botës po diskutojnë, ndërsa Gaza pret ndihmë?

Armëpushimi

Në thelb do të thotë që luftimet do të  ndalojnë. Një armëpushim është subjekt i marrëveshjes nga të gjitha palët dhe zakonisht përfshin një proces politik formal me angazhime për të de-përshkallëzuar konfliktin, si tërheqja e armëve ose ripozicionimi i forcave.

Armëpushimi tenton të mbulojë të gjithë hapësirën gjeografike në të cilën po zhvillohet lufta. Mund të çojë në një zgjidhje të përhershme. Ky është opsioni afatgjatë i refuzuar nga SHBA, Britania e Madhe dhe vende të tjera, të cilat mbështesin të drejtën e Izraelit për t’u mbrojtur duke vazhduar luftën e tij kundër Gazës.

Në të kundërt, Sekretari i Përgjithshëm i OKB-së Antonio Guterres ka bërë thirrje publikisht për një armëpushim të menjëhershëm humanitar. Samir Puri, një ekspert për studimet e luftës në King’s College në Londër, mendon se një armëpushim është “i paimagjinueshëm” në këto rrethana.

Ndërprerja e armiqësive

Shumë e përdorin këtë term si sinonim për armëpushimin. Megjithatë, një ndërprerje e armiqësive në përgjithësi është më pak e strukturuar. Marrëveshjet nuk priren të mbulojnë çështje si objektivat, afatet kohore, siguria dhe monitorimi. Ato u mundësojnë palëve të shkëputen nga lufta si një hap për të biseduar dhe ndoshta duke shkuar drejt një armëpushimi të qëndrueshëm. Në këtë kuptim, ndërprerja mund të shihet si një hap i mundshëm drejt përfundimit të luftës.

Një marrëveshje për t’i dhënë fund armiqësive

Është opsioni i flamurit të bardhë. Palët në konflikt mund të kenë vendosur të bëjnë një pushim pas luftimeve intensive. Nga vetë natyra e tyre, armëpushimet mund të vijnë dhe të shkojnë gjatë një konflikti, ndonjëherë duke u zbatuar në zona të veçanta. Ato mund të mundësojnë aktivitete si largimi i të plagosurve ose varrimi i të vdekurve. Kuptohet që forcat kundërshtare nuk duhet të ndryshojnë pozicione derisa është në fuqi një armëpushim.

Pauza humanitare

Këtu bëhet fjalë për ndërprerjen e përkohshme të luftimeve, thjesht për arsye humanitare. Pushimet ndonjëherë kufizohen në një zonë të caktuar gjeografike ku po kryhen aktivitetet humanitare. Zakonisht në fuqi për një periudhë të caktuar, një pauzë mund të zgjasë deri në disa orë. Draft-rezoluta fillestare e SHBA-së nuk përmendi një pauzë, por nënvizoi të drejtën e Izraelit për të mbrojtur veten dhe kërkoi që Irani të ndalonte armatimin e përfaqësuesve të tij në rajon.

“Një pauzë humanitare do të ishte efektivisht një armëpushim për të lejuar kalimin e ndihmave ose njerëzve të zhvendosur”, tha Puri.

Ditët e qetësisë

Ky është një mekanizëm që do t’u mundësonte mjekëve dhe personelit tjetër akses në zonat e luftës në ditë të caktuara. Shpesh përdoret nga UNICEF për të siguruar që fëmijët të kenë akses në kujdesin shëndetësor gjatë konfliktit. U përdor për herë të parë në El Salvador në vitin 1985 kur agjencia e OKB-së për fëmijë negocioi një pushim tre-ditor në luftime.

S.S/Shqiptarja.com

TAG:
• lufta ne rripin e gazes
• sulmohet izraeli