Aurela Gaçe “sulmon” kolegët
që refuzojnë të këndojnë shqip

Aurela Gaçe, ylli i skenës shqiptare, ka shprehur përmes një postimi në "Facebook" shqetësimin e saj për këngëtarët shqiptarë, që mendojnë se të jesh modern do të thotë të këndosh këngë të huaja...

Ja se ç'shkruan Aurela: “Çfarë do të thotë të jesh moderne? Ose me saktë, të mos shijosh muzikën e vendit tënd? Se kam dëgjuar shpesh edhe këngëtarë që e këndojnë me dëshirë një këngë botërore, por me përtesë një këngë shqiptare. Ose ndodh shumë që edhe në konkurset e shumta muzikore, të ketë më shumë këngë të huaja e shumë pak shqiptare. Këtë mendësi, e kam dëgjuar edhe nga ata që vetëquhen Elitë e vendit.I kam dëgjuar në biseda televizive të thonë se janë qytetarë të botës. E vërtetë shumë. Ashtu ndihem edhe unë, qytetare e botës, në çdo aspekt. Por, përpara se unë të njoh komshiun, ose gjitonin tim, duhet të di kush është babai im . Nuk mundet kurrësesi të duash e të respektosh komshiun, kur ti përbuz familjen tënde. Dhe kjo gjë ndodh rëndom tek Elita jonë.



E shohin të qenurit shqiptar, barrë të rëndë. Të jesh qytetar i botës, duhet të jesh një herë anëtar i familjes tënde, i lagjes, i qytetit, vendit tënd. i them këto sepse shpesh gjendem përballë muzikantëve e këngëtarëve që kujtojnë se po këndove vetëm muzikë të huaj, ashtu bëhesh modern, ashtu quhesh Elitar. Dua të këndoj në shumë gjuhë të botës, pse jo të kem mundësi të këndoj repertorin më të bukur botëror?

Por, s'kam se si, nëse nuk këndoj një herë atë këngë që më ka tingëlluar ne shpirt qysh fëmijë. Edhe nuk kam turp të them se nga vij, ku ka lindur e jam rritur. Atë gjë nuk e zgjedh unë. Ashtu e vendos Zoti. Të lindësh në fshat apo qytet, në Shqipëri , a diku tjetër në botë, përsëri se vendos dot ti (se maternitetin mund ta gjesh ku të duash në këto ditë që kanë ardhur, por prindërit nuk i ndryshon dot). Populli i thjeshtë e do veten e vetë. Elitarët mesa duket jo. Kaq kisha”. Me këto fjalë mbyll postimin në "Facebook" këngëtarja.

Shkrimi u botua në numrin e sotëm të suplementit “THASH&THEM” te gazetës “Shqiptarja.com”

Redaksia online
(b.t/shqiptarja.com)