Bajram Begaj ktheu ligjin për shtetësinë, Rusmajli te 'Siguria': Nuk siguroi 3/5 e votave në Kuvend

Çështja e dekretit të presidentit Bajram Begaj që riktheu për shqyrtim ligjin për shtetësinë u diskutua në Komisionin e Sigurisë.

Këshilltari i presidencës Ilir Rusmajli sqaroi arsyet e kthimit të ligjit, duke risjellë në vëmendje se Kushtetuta kërkon votimin e ligjeve në 3 komponentë: Votimi në parim, nen për nen dhe në tërësi.

“Ligji për shtetësinë kërkon miratim me shumicë të cilësuar prej 3/5 e votave. Nga dokumentacioni kemi konstatuar se në grupin e amendamenteve që janë bërë në seancë, nuk është siguruar dot shumica e cilësuar”, argumentoi Rusmajli.

LEXO EDHE:
Kuvendi këtë javë/ Në pritje të amnistisë penale, cili grup i PD do të japë votat? Mblidhen sërish ‘Shëndetësia’ e ‘Tims’

Sipas tij, Presidenti ka të drejtë të vendosë veton ndaj ligjeve, për defekte që i përkasin sferës së të drejtës kushtetuese.

“Një pjesë e dispozitave krijojnë hapësire për disbalancim të praktikës së dhënies së shtetësive. Tërheqim vëmendjen që të merrni në konsideratë respektimin e parimeve bazë për dhënien e shtetësive”, shtoi këshilltari i Presidentit.

Vendimi se si do të procedohet në vijim do të merren në mbledhjen e ardhshme të Komisionit të Sigurisë.

 

SI.E./r.k./Shqiptarja.com

TAG:
• komisioni i sigurise
• ilir rusmajli
• shtetesi