Balla: Nuk ka krizë në koalicion 
me LSI edhe pas 18 qershorit

Nënkryetari i grupit parlamentar socialist, Taulant Balla, thotë se koalicioni qeverisës nuk është në krizë. I ftuar në "5 pyetje nga Babaramo" në Report TV, Balla komentoi tensionet e fundit brenda mazhorancës si dhe shkarkimin e ministrit të Drejtësisë, Ylli Manjani. 

Sipas Ballës, kritikat e ministrave të LSI-së ndaj atyre të PS-së duhet të ishin adresuar në rrugë institucionale dhe jo nëpër ekranet e televizioneve. Ai sqaroi se shkarkimi i Ylli Manjanit dhe emërimi i Petrit Vasilit u bënë në konsensus të plotë mes PS-së dhe LSI-së. 

"Ministrat kanë të gjithë mundësinë që kritikat e tyre t'i bëjnë në mbledhjen e qeverisë, pranë Kryeministrit, pranë kryetarit të Kuvendit, të cilët janë dy bashkëkryetarët e Aleancës për Shqipërinë Europiane. Ajo që do të theksoja se s'ka qenë e mirë dhe nuk është e pranuar, është që një ministër të kritikojë kolegun e tij në qeveri në këto rrethana. Pra, nëse ke dështuar që shqetësimin tënd ta ngresh në struktura, nëse një ministër socialist do të kritikonte një ministër të LSI-së në publik, pa e ngritur atë në mbledhje të qeverisë, grupit parlamentar socialist, pa i kërkuar një takim kryetarit të grupit parlamentar të LSI apo të kryetarit të LSI dhe kryetarit të Kuvendit, atëherë merr vlerë kritika, pasi në të kundërt tregon sesi hidhet një inat personal, apo është një lojë politike me të cilën nuk ka kohë të merret njeri", u shpreh Balla.  

Deputeti socialist theksoi se koalicioni me LSI-në do të vijojë dhe në këtë funksion, sipas tij, LSI është ftuar për të vijuar koalicionin edhe për zgjedhjet e 18 qershorit.

"LSI-në e kemi ftuar në dhjetor të vitit të kaluar që të firmosim përsëri një kontratë për të bashkëqeverisur. LSI le të bëjë zgjedhjet e veta në të drejta te tyre për të zgjedhur. Ne si PS jemi të bindur që kemi ditur në mënyrën sesi kemi qeverisur këtë vend, në mënyrën sesi kemi çuar përpara reforma shumë të rëndësishme, të bindur që e kemi futur Shqipërinë në rrugën e duhur në çdo sekond. Aleanca për Shqipërinë Europiane do të vijojë edhe në prill, do të vijojë edhe në shtator, për të çuar përpara reformat që kemi nisur", theksoi Balla.

Ndërkaq, në cilësinë e kryetarit të komisionit hetimor për CEZ, Balla kujtoi se dëshmitarët të cilët kanë refuzuar komisionin do shoqërohen me forcë nga policia.

Për të dëshmuar është thirrur edhe Shkëlzen Berisha, djali i ish-kryeministrit Sali Berisha, i cili do dëshmojë përpara deputetëve pasditen e 1 shkurtit. 


5 pytje nga Babaramo - I ftuar Taulant Balla ( pjesa e 1 )

TAG:
• shkelzen berisha