Deputetët e majtë gjermanë në Tiranë: Shqipëria dhe Bashkimi Europian duhet të mbajnë brenda Krishtlindjeve Konferencën e parë Ndërqeveritare

Teksa në Gjermani pritet që shumë shpejt të ketë një qeveri të re me socialdemokratët që fituan zgjedhjet e kaluara parlamentare, PSD atje premton më shumë mbështetje për Shqipërinë në rrugëtimin drejt Bashkimit Evropian.

Kanë qenë deputetët e PSD gjermane që e kanë shprehur një angazhim të tillë në një takim që kanë pasur me kryetarin e grupit Parlamentar të Partisë Socialiste, Taulant Balla ditën e sotme në ambientet e Kryesisë së Kuvendit.

Delegacioni i përbërë nga 2 anëtarë të Bundestagut gjerman shprehet se do të ketë një bashkëpunim edhe më të madh mes partive simotra.

Ai tha se Shqipëria ka bërë progres sidomos në reformën në drejtësi e cila ishte një ndër kushtet thelbësore të Bashkimit Evropian.

 “Jam shumë i gëzuar që jam këtu dhe Partia social demokrate do të ndihmojë për të inkurajuar për vendimmarrjen pozitive për Shqipërinë në Bashkimin Evropian. Ne përshëndesim përparimet dhe progresin që ka bërë Shqipëria në lidhje me reformën në drejtësi i cili ishte një kusht i BE dhe jemi të gëzuar që shohim parlamentin e ri pozitën dhe opozitën të cilët duhet të bashkëpunojnë dhe të krijojnë institucione të forta. Jemi të bindur që kjo iniciative do të jetë e frytshme edhe në të ardhme”, tha njëri prej deputetëve.

Ndërkohë që nga ana e tij Balla tha se gjatë bashkëbisedimet u cek hapja e negociatave për Shqipërinë, teksa kolegët nga Gjermania shprehën mbështetje.

 “Patëm një bisedë shumë të frytshme. Kjo vizitë ka ardhur menjëherë pas publikimit të paketës së zgjerimit ku u vërtetua dhe njëherë se Shqipëria dhe BE do të mbajnë para Krishtlindjeve konferencën e parë ndërqeveritare e cila i hap më tej rrugën negocimit të marrëveshjes për anëtarësim”, tha Balla.

Kujtojmë se Komisioni Europian  publikoi 2 ditë më parë progres raportin për Shqipërinë, ku edhe në këtë raport KE rekomandon hapjen e  negociatave për Shqipërinë, pasi i ka plotësuar kushtet. Reforma administrative territoriale është një tjetër pikë e prekur në Raport ku theksohet se duhet të vijojë decentralizimi i pushtetit lokal dhe të bëhet më shumë për autonominë dhe financat e bashkive. KE thotë se Shqipëria ka shënuar përparim në forcimin e luftës kundër korrupsionit dhe ka bërë përparim të mirë në luftën kundër krimit të organizuar, duke shënuar rezultate të mira në këtë drejtim.

K.T./Shqiptarja.com

TAG:
• PS
• taulant balla
• Bashkimi Europian
• gjermania
• integrimi europian