Bashkia e Skraparit tender për drekë në nder të Pëllumb Piperos, mjeku: Anullojeni, lekët të shkojnë për personat në nevojë

Bashkia e Skraparit hap tender për organizimin e një dreke me rastin e dhënies së titullit “Qytetar Nderi” mjekut Pëllumb Pipero, por mjeku ka kërkuar anulimin e kësaj dreke dhe me atë shumë të ndihmohen familjet e varfra në qytet.

Ai falenderon bashkinë për këtë organizim, por në respekt të situatës kërkon që shpenzimet të orientohen për nevoja të tjera të Bashkisë dhe qytetarëve të Skraparit.

Sipas dokumentit të bashkisë,  tenderi do të zhvillohet më 11.06.2020, në orën 10:30, dreka do të ketë 60 të ftuar, ndërsa menuja parashikon tre pjata, pije e fruta dhe do të mbahet në datën 19 qershor. Mjeku Pipero u shpall “Qytetar Nderi” i Skraparit më 28 maj me propozim të kryetarit të Bashkisë Skrapar, Adriatik Mema.

Titulli u dha me motivacionin “Për veprimtari të shquar profesionale dhe akademike gjatë karrierës së tij në fushën e mjekësisë, veçanërisht në atë të sëmundjeve infektive, si dhe për kontributin e çmuar profesional dhe publik ne përballimin e situatës së pandemisë të shkaktuar nga Covid-19”.

Postimi i plote i Piperos:

'Fama' ime i përket çdo bluze të bardhë thashë, por paska edhe “ca kusure”.
Këshilli Bashkiak i Skraparit më ka akorduar Titullin “Qytetar Nderi” që është nderi më i madh që mund të më bëjë vendlindja ime dhe për të cilin do t'i jem gjithë jetën mirënjohës, qytetarëve, Këshillit Bashkiak dhe Kryetarit të Bashkisë së Skraparit. Dhe “kusuri” është lajmi që po lexoj në të gjitha portalet se Bashkia ka vendosur të organizojë dhe një drekë në cermoninë që do të organizohet me këtë rast!

Do ta konsideroja një nder po aq të madh, që në respekt të situatës dreka të anullohet dhe ajo shumë sado modeste qoftë të orientohet për nevoja të tjera të Bashkisë dhe qytetarëve të Skraparit, ndoshta në ndihmë të familjve në nevojë!
Duke ju falenderuar edhe një herë, ju premtoj se do punoj gjithë jetën time me përkushtim profesional e përgjegjësi qytetare, për ta merituar Titullin e Qytetarit të Nderit të Vendlindjes time!
Me mirënjohje! Pëllumb Pipero

 

 

/B.K./Shqiptarja.com

TAG:
• skrapar
• tender
• qytetar nderi
• Pëllumb Pipero