Nisi ciklin e foltoreve nga Tirana, Berisha: Do fillojmë analizën paszgjedhore, s'duhet të shndërrohet në gjueti shtrigash! Jemi në fazën e betejës vendimtare

Berisha ka mbajtur sot një tjetër formë foltoreje, duke takuar anëtarët e saj të Kryesisë nëpër degë, që nisi me ata të degës 9 në Tiranë.

Ky takim i Berishës që u iniciua për të bashkuar dhe dëgjuar demokratët, duket se është shoqëruar me një incident që tregoi një përplasje mes kryetares së PD në këtë degë, Eda Grimci, dhe një prej anëtarëve.

Në mbyllje të takimit, kur zëdhënësja e PD Florjana Gara iu drejtua sallës duke pyetur nëse kishe më pyetje, zotëria në fjalë ngriti dorën.

Grimci ndërkohë tha se s’ka pyetje dhe kërkoi që takimi të mbyllej.

“Florjana, po ti nuk më dëgjon mua po jo nuk duhet ta bësh ti atë gjë”, i drejtohet Grimci me zë të ulët Florjana Garos pasi kjo e fundit i dha fjalën anëtarit të Kryesisë.

Ndërsa Garo dhe Berisha i dhanë fjalën, demokrati tha se nuk punon mikrofonin, por Berisha e ftoi pranë mikrofonit të tij. Ky i fundit tregoi më pas përplasjen që kishte pasur me Kryetaren, duke e akuzuar se e ka sharë, e ka kërcënuar dhe se nuk ka bërë organizime në protestat që PD ka thirrur.

“Unë jam Halit Koleci, i përndjekur politik katër breza. Unë banoj në njësinë 9, që kur ka fillu PD kam qenë anëtar, me të gjitha funksionet asnjë punë asnjë gjë se kam marrë nga PD, as nuk e ka lyp. Këto zgjedhjet e fundit që ke stadiumi, Kryetarja foli por nuk tregoi se çfarë nuk kishte bërë, por foli për ato që kishte bërë. Ne kemi qenë te stadiumi, por nuk ka qenë thirrë asnjë, më ka thirr thënë hajde këtu, por nuk më kishte çu një mesazh a një ftesë. Unë kisha mbledh njerëzit, i kam me foto, i kam marrë nga Durrësi nga Kamza… unë nuk e kam dëgjuar por më ka futur një të shame… kjo është fëmija im. Unë se kam dëgjuar por ma ka thënë një shok. Ta kam thënë! Kemi qenë te rruga ‘Shpresa’, ke 8 Janari, s’kemi pas thirrje as organizim, më ka thirr një katunari im se ishte duke vdek nga gazi lotsjellës. Kam fotot. Tani vjen puna e zgjedhjeve, nuk tha sesa seksione janë shkrirë, nuk tha se ai që ka shkrirë seksionet ka kalu kryetar i grupseksioni. Nuk e tha këtë. Në zgjedhjet e fundit më thërret dhe më thotë do të shkosh kryetar komisione, po i them, nëse nuk ka njeri shkon. Do të çojmë te burgu, i thash mos më ço te burgu se kam fol 1 mijë të zezat për Edi Ramën dhe i ka çu dokumentet dhe i kam thënë me kë jam…. në ka kërcënuar në telefon, i kam çu në zyrë dhe më ka thënë dil përjashta. Për kartën e anëtarësisë nuk ma jepte deri sa shkova te Klevisi. Nëse ne do përçahemi me njëri-tjetrin atëherë nuk kemi për të fituar”, tha ai.

“Të garantoj që ka vlerësim maksimal për punën tënde, e vlerësoj shqetësimet që shprehe”, tha Berisha.

Sali Berisha deklaroi se Partia Demokratike do të jetë kundër listave të mbyllura në zgjedhje.

Ai tha se të gjitha partitë opozitare janë dakord që të mos pranojnë të garojnë me dy lista. Berisha shtoi se nëse do të refuzoheshin më 11 maj, kjo duhet të bëhej me një ujdi të plotë opozitare, në të kundërt PD nëse nuk do të hynte në zgjedhje, do të bënte vetëvrasje.

'Ne nuk pranojmë një sistem me lista të mbyllura, ne mund të mos e pranonim djhe në zgjedhjet që shkuan, por kjo do të kërkonte një ujdi të plotë opozitare. Nëse nuk do të binim dakord, ajo do ta kërcënonte PD, nëse nuk do të hynte në zgjedhje, bënte një vetëvrasje. Ai sistem, të parët kundër tij do jemi ne. Këtu diskutojmë si ti zgjedhim kandidaturat, ne përdorëm Primaret. Ishin vota juaj në listat e hapura, harrojeni se nuk do të jenë më në listat e tjera. Sic i përdorëm ne janë shumë të rralla, pra pa seleksionim, vendi që i ka bërë më herët se ne i ka me seleksionim', tha ai. 

Sali Berisha ka nisur sot turin e takimeve në bazë, duke filluar nga Njësia 9 në kryeqytet.

Takimet që ai po i quan Kuvendi i qytetarëve dhe deputetëve po ndjekin Foltoren 2 përpara kryeministrisë, mirëpo ajo që po vihet re është braktisje e madhe nga demokratët.

Në takimin e sotëm në Tiranë, ajo që të binte në sy ishte salla bosh dhe një grusht i vogël njerëzish.

Përveçse në realitet, Berisha po braktiset edhe virtualisht, ndërkohë që takimin e sotëm kanë qenë vetëm 293 vetë që e kanë ndjekur më kohë reale.

Kreu i PD Sali Berisha nga takimi me bazën demokrate në njësinë 9, tha se PD duhet që të riorganizohet.

Ai tha se ndryshimi kërkon angazhimin e të gjithë demokratëve. Berisha kërkoi që fokusi të jetë në denoncimin e farsës elektorale.

'PD do të riorganizohet dhe ripërtëritet dhe për këtë kërkohet kontributi i secilit prej jush, sepse këtë se bëjë dot as unë i vetëm dhe as tjetri, po se bëri secili nga ne. Të gjithë duam të shohim njerëz të rinj në krahun tonë dhe duhet të shohim cilat vlera mund ti ofrojë unë PD. Secili duhet të thotë ca hapësire duhet që të krijoi unë më shumë. Në kushtet e diktaturës autoritare ne jemi në mision për ta rrëzuar këtë diktaturë dhe për këtë duhet kontributi i secilit prej jush. Keni bërë dhe po bëni sugjerime të çmuara që s’do të bien në veshë të shurdhër. Duhet të merremi me denoncimin e farsës elektorale. Kemi paraqitur krimin zgjedhor’, tha ai.