Bilanci 2013/ Mazhoranca e
Ramës, viti i ringritjes së madhe

TIRANE- Mazhoranca aktuale e drejtuar nga kryeministri Edi Rama në vitin e ri 2013 ka hyrë si një parti opozitare, jo në koalicion me LSI e Ilir Metës por me ambicjen për të fituar zgjedhjet parlamentare të 23 qershorit. Kreu socialist që në fund të janarit startoi me mbledhjen e Asamblesë së PS, ku hodhi piketat e fitores së ardhshme duke përcaktuar si synim krijimin e një koalicioni sa më të gjërë parazgjedhor dhe shpeshtuar kontaktet dhe me Metën në funksion të këtij koalicioni. Ndërkohë që shtoi kontaktet me partnerët ndërkombëtarë, për të krijuar mbështetjen e duhur falë dhe gabimeve të ish-kryeministrit Berisha, i cili me gjuhën e fortë nacionaliste të përdorur para, gjatë dhe pas 100 vjetorit të pavarësisë, kishte krijuar jo pak mosbesim te ndërkombëtarët.

Gjithë kjo situatë precipitoi në favor të opozitës së atëhershme me pranimin e ftesës së Ramës nga ana e Ilir Metës për të dalë nga koalicioni qeverisës me Berishën e për të hyrë në aleancën e madhe të majtë, pikërisht më 1 prill të këtij viti. Që solli dhe riformatimin e qeverisjes së vjetër dhe konturimin e koalicionit të madh të majtë. Marrëveshja u nënshkrua disa ditë më vonë në Shkodër, nën monitorimin e të majtëve evropianë, që punuan shumë për të bërë bashkë Ramën me Metën. Me këtë garanci të fortë në dorë, madje dhe pasi kishte tërhequr më vonë anëtarët e KQZ përfaqësues të opozitës duke e lënë KQZ me 4 anëtarë pa fuqinë ligjore të marrjes së vendimeve të rëndësishme, koalicioni i majtë hyri në zgjedhjet parlamentare të 23 qershorit, duke shënuar një fitore të jashtëzakonshme, plot 83 deputetë në Kuvendin e Shqipërisë.

Pavarësisht të gjitha përplasjeve gjatë fushatës, mungesës së anëtarëve në KQZ, por dhe me një Kolegj Zgjedhor tërësisht në shërbim të Berishës, e majta e bashkuar ia doli për të fituar zgjedhjet në mënyrë plebishitare për të kaluar Berishën dhe aleatët e saj, pas tetë vitesh në opozitë. Nga ana tjetër u deshën vetëm pak ditë për të formatuar kabinetin e ri qeveritar, ku më 31 korrik kryeministri i mandatuar Edi Rama bëri publik 19 emrat e ministrave të rinj, me të cilëve 5 ministra të LSI, dhe 14 të PS. Si asnjëherë tjetër në përbërjen e kabinetit qeveritar kanë qënë gjashtë femra, mes të cilave dhe Ministrja e Mbrojtjes, për herë të parë kjo në historinë e shtetit shqiptar kur në krye të këtij dikasteri “lufte” emërohet një femër. Ndërsa në krye të Kuvendit vendoset kreu i LSI Ilir Meta.

Ndërkohë që qeveria dhe kryeministri i emëruar kanë qëndruar për afër një muaj e gjysmë pa marrë në dorë frenat e qeverisjes së vendit, ku qeverisja në detyrë e Berishës u shoqërua me akuzat e Ramës se po shpërdoron buxhetin e shtetit dhe se po bënte emërime të militantëve pa kriter. Vetëm më 15 shtator qeveria e re mori votën e Kuvendit dhe u betua para presidentit Nishani, duke filluar zyrtarisht punën. Vendimet e para të ditës së parë të qeverisë kanë qënë anulimet e disa koncensioneve e privatizimeve të qeverisë Berisha ndërsa ka vijuar me diplomacinë parlamentare, shembjen e ndërtimeve pa leje në Vlorë dhe qytete të tjera, si dhe përgatitjen dhe miratimin e buxhetit shtesë 2013 dhe të ri për vitin 2014.

Armët kimike
Shqipëria në nëntor refuzoi angazhimin për asgjësimin e armëve kimike siriane në Shqipëri, sipas kërkesës së SHBA. Protestat para kryeministrisë dhe mungesa e kapacitetit të shtetit shqiptar për një mision të tillë, bënë që Rama të refuzojë.
 
1 prill 2013
Rama dhe Meta arrijnë akordin për koalicion parazgjedhor, ku LSI ka vendosur të pranojë ftesën e Partisë Socialiste për koalicion me të. Kreu i LS Ilir Meta, ka zyrtarizuar largimin nga Qeveria “Berisha” e ka pranuar publikisht ftesën e liderit të PS.
 
23 qershor 2013
Opozita e drejtuar nga Edi Rama fiton thellësisht zgjedhjet parlamentar përballë të djathtës së drejtuar nga ish-kryeministri Sali Berisha. Me plot 83 mandate të partive të në koalicion, e majta vjen në pushtet pas tetë vitesh në opozitë.
 
15 shtator 2013
Pas një muaji e gjysmë nga formatimi i qeverisë së dhe qëndrimi në mbikqyrje të qeverisë në detyrë të drejtuar nga berisha, më në fund qeveria e re e drejtuar nga Rama dekretohet, votohet në Kuvendin e Shqipërisë dhe betohet para presidentit të Republikës.
 

 Shkrimi u publikua sot (29.12.2013) në gazetën Shqiptarja.com (print)

Redaksia Online
(d.d/shqiptarja.com)

TAG:
• kqz
• OSBE