Një automjet luksoz, Rolls-Royce u bllokua nga Policia e Lezhës, ndërsa për pronarin e tij nisi hetimi pasuror.

Në një njoftim zyrtar, policia tha se pronari i mjetit, banues në Mbretërinë e Bashkuar, nuk kishte dokumentacion të plotë.

Fokusi i policisë është të verifikojë burimin e të ardhurave me të cilat është blerë automjeti përballë dyshimeve se mund të jetë përfituar nga veprimtari kriminal.

Po ashtu, blutë janë fokusuar edhe në zbulimin e origjinës së automjeteve luksoze dhe historikun e blerjes, për të parandaluar trafikimin e tyre. 

Njoftimi i policisë:

Strukturat e Policisë së Lezhës kanë intensifikuar kontrollet ndaj automjeteve luksoze, me qëllim evidentimin dhe verifikimin e mjeteve që dyshohet se mund të jenë përfituar nga veprimtaritë kriminale, si dhe parandalimin e trafikimit të tyre.

Në kuadër të këtyre kontrolleve, strukturat për Hetimin e Krimeve Ekonomike dhe Financiare, në bashkëpunim me shërbimet e Forcës së Posaçme Operacionale dhe të Policisë Rrugore, kanë kryer kontrollin e një automjeti luksoz që kanë konstatuar në qytetin e Lezhës. 

Nga Seksioni për Hetimin e Krimeve Ekonomike e Financiare janë kryer verifikime lidhur origjinën, historikun e blerjes, shitjes dhe posedimit të automjetit, mbi pronësinë dhe burimin e të ardhurave me të cilat është blerë automjeti. 

Në përfundim të verifikimeve, është kryer bllokimi administrativ i automjetit “Rolls-Royce” për mungesë dokumentacioni dhe ka nisur hetimi pasuror për pronarin e automjetit, shtetasin F. M., banues në Mbretërinë e Bashkuar.

Policia e Lezhës do të vijojë kontrollet e përbashkëta dhe verifikimet ndaj automjeteve luksoze, me qëllim evidentimin e pasurive me burim kriminal dhe goditjen e pastrimit të produkteve të veprimtarive kriminale.