Braçe: Në shtator i paraqes Kuvendit ligj për ndalimin e zjarrvënies së qëllimshme, djegia e vendit të marrë fund

TIRANË- Prej disa javësh, vendi ynë po përballet me vatra aktive flakësh, nga jugu në veri. Nisur nga kjo situatë, deputeti socialist Erion Braçe njofton se në shtator do t’i paraqesë Kuvendit ligj për ndalimin e djegies së tokës përmes zjarrvënies së qëllimshme. Braçe thotë se kjo mund të jetë një përpjekje e vogël, por mund të bëhet edhe shkas që të ndalohet djegia e vendit.

“Shiheni, kështu digjet toka! Duket si toka e zjarreve! Toka nuk duhet të digjet më, duhet ndaluar! Në shtator do paraqes në Kuvend ligj për ndalimin e djegies së tokës përmes zjarrëvënies së qëllimshme! Një përpjekje qoftë edhe kaq, për të ndalur djegien e këtij vendi! Aktualisht janë katër vatra aktive në vend, në Shetaj të Durrësit, Mal Bardhë të Kurbinit, Sojnik të Gramshit dhe Prongji të Gjirokastrës.

Gjatë 24 orëve të fundit kanë qenë aktive 28 vatra zjarri në të gjithë vendin, ndërkohë që vijojnë aktive 4 vatra. Situata më problematike nga zjarret deri më tani ka qenë djegia e 38 shtëpive të pabanueshme në Malësi të Madhe e Selenicë, ndërsa në të gjithë vendin janë djegur qindra hektarë pyje, e sipërfaqe me shkurre e barishte. 

Problematike ka qenë situata edhe në ishullin e Sazanit, ku gjatë muajit qershor u përfshi nga flakët për katër ditë më radhë, ndërsa për shuarjen e zjarrit u desh ndërhyrja me helikopter nga autoritetet greke.  

SI.E./B.K./Shqiptarja.com

TAG:
• zjarret ne vend
• Erion Braçe
• zjarret 2022