Çështja 'Beleri' mund të ishte zgjidhur elektoralisht

Në zgjedhjet e prillit 2021, PS-ja mori 60% të votave në territorin e Bashkisë Himarë. Dhe ai votim ishte bio i brendshëm, sepse ngaqë rreziku i Covid-19 ishte i madh, shteti shqiptar i bllokoi kufijtë me fqinjët. Si rrjedhojë, zgjedhësit himariotë me banim në Greqi nuk mund të vinin me autobusë të paguar për të votuar.

Po para pandemisë, si ishte situata elektorale në Bashkinë Himarë?

Më 2019, gara u zhvillua pa kundërshtarë, sepse opozita i bojkotoi zgjedhjet. Por më 2017, PS-ja mori 57% të votave në territorin e Bashkisë Himarë. Ndërsa më 2015, kur edhe Beleri ishte drejtpërdrejt në garë, vetëm 27% të votave mori, kundrejt 56% të votave që mori socialisti Goro.

Vijmë tani tek 14 maji i sivjetshëm.

Socialisti Goro kishte përballë sivjet vetëm “minoritarin” Beleri, që mbështetej nga të gjithë partitë opozitare, si dhe nga minoritarët e autobusave të paguar që erdhën nga Greqia. Mund të ketë patur shumë arsye pse himariotët e këtushëm të mos ishin aq entuziastë për të votuar përsëri socialistin Goro, por u bë mëse e qartë se minoritarët e autobuasave të paguar ishin më se të motivuar të vinin nga Greqia, pas arrestimit të Belerit në një grackë korrupsioni të përgatitur nga policia e qarkut Vlorë.

Nuk dihet se çfarë ose kush e motivoi policinë e qarkut Vlorë për t’i ngritur grackën ku ra brenda Beleri si derr në thes. Nuk dihet se sa firo personale elektorale mund të ketë patur Goro nga mënyra e qeverisjes së tij në Himarë. Por dihet se numri i i autobusëve që erdhën në Himarë nga Greqia për 14 majin arriti një rekord historik – kjo, sipas raportimit nga terreni të shumë mediave televizive.

Teksa Kryeministri, Presidenti e gjykatat e Shqipërisë mundohen aktualisht të lundrojnë nëpër ngushticat shkëmbore diplomatiko-juridike që ka krijuar çështja “Beleri”, analiza e mësipërme na tregon se kjo çështje mund ishte zgjidhur thjesht elektoralisht me një fitore të Goros më 14 maj. Duke e lënë arrestimin e Belerit pas 14 majit.

M.T/Shqiptarja.com

TAG:
• eduart zaloshnja
• arrestohet Fredi Beleri
• himare