Debate në FRONTLINE/ Muça përplaset me Burimin: Ju ka marrë ferra uratën, mos po kërcënon? Nuk jam i rrjedhur! Nurja: dënim i rëndë Hoxha: Do vinte një ditë

Debate të forta për dënimin e sotëm në panelin e Report TV të emisionit “Frontline”, me temë dënimin e deputetit Ervin Salianji.

Gazetari Flogert Muça theksoi se ndërsa deputeti i PD ishte në “zenithin e tij me çështjen Babale, vendimi i sotëm për të e dëmtoi jo vetëm juridikisht, por edhe politikisht”. Maksimizimi që ai kishte arritur në politikë, tashmë u dënua me humbjen e mandatit. Ai u shpreh se Salianji nuk është dënuar për shpifje, por për kallëzim të rremë.

“Është vërtetuar se Salianji ishte regjisori që ka regjistruar një bisedë të rreme ndaj vëllait të ish-ministit Xhafa”, tha Muça. Më tej ai pati një debat të fortë edhe me Genc Burimin, i cili ishte në lidhje Skype nga Franca.

LEXO EDHE:
Sherri në PD, Kara: Berisha po bën Primare me vulë të vjedhur, po kërkon alibi për humbjen e zgjedhjeve! Kuçana: Të gjithë drejtuesit e partisë t’i nënshtrohen garës

Burimi e cilësoi dënimin të rëndë dhe të tepruar, duke bërë krahasime me disa raste në Francë, përfshi edhe Sarkozi. Ai këmbënguli se ka dallime mes shpifjes dhe kallëzimit të rremë.

“Dënimi është shumë i rëndë”, tha Burimi.

Debati kaloi edhe me shkëmbim batutash mes gazetarit Flogert Muça dhe Genc Burimit, teksa i dyti e cilësoi si “djalosh” apo "agjent të qeverisë", kurse i pari i kujtoi se “e kishte marrë ferra uratën”, duke bërë edhe ironi me të.

“Fredi Belerin e nxore nga burgu, shko e nxirr edhe Ervin Salianjin. Jemi të gjithë të barabartë para ligjit, jo deputeti i nënës dhe ne të tjerët të njerkës. Jam djalosh, nuk kam rrjedhur. Ti je i tensionuar, ndaj qetësohu. Mos po kërcënon?”, tha Muça.

Franc Nuri, jurist PD, u shpreh se “nuk e priste vendimin”.

“Është një vendim i ashpër, ekstrem, në lidhje me një nga akuza me të lehta të Kodit Penal. Mund të ishte dënuar me kusht, me shërbim prove, shërbim në komunitet”, tha ai.

Ndërsa gazetari Poli Hoxha u shpreh se “vendimi do vinte një ditë”.

“Ky vendim do vinte një ditë, siç do vijë për Berishën, gjithë të tjerët, madje edhe Edi Ramën. Kjo është drejtësia, një herë të kënaq një herë të hidhëron e një herë të ëmbëlson. Nuk them dot nëse është vendim i drejtë, por nuk mund të sulmosh gjyqtarët, një herë i lavdëron si trimëresha që i dhanë vulën dhe njëherë i akuzon për dënimin e Salianjit. Janë gjyqtaret e njëjta”, tha Hoxha ndër të tjera.

A.Q/I.M/Shqiptarja.com

TAG:
• Skerdjan Dhuli
• poli hoxha
• genc burimi
• flogert muca
• ervin salianji
• dosja babale
• dosja ervin salianji
• frontline
• report tv