Në komisionin parlamentar të Kulturës, ku diskutohej buxheti për Drejtorinë e Përgjithshme të Arkivave, diskutimet u fokusuan te zhvillimet e fundit politike në vend. Kryetarja e komisionit, deputetja e PD-së, Ina Zhupa, tha se mbledhja e Asamblesë së PS-së të shtunën, ishte si pleniumet dikur. Ajo ftoi deputetët socialistë t’i bashkohen protestës, për t’i paraprirë përjashtimeve të mundshme nga partia.

““Shoh që paskeni ardhur pas vakisë së të shtunës.  E pashë dhe kujtova nga arkivat Pleniumet e Partisë atë që kishte lënë mangut Partia e Paunës. Ky i binte Pleniumi i 18 ku udhëheqësi shpalli armiqtë e brendshëm. PS është kthyer në zgjatim personal të Ramës që merret vetëm me hallet e një grupi njerëzish që rrethojnë atë për të mbajtur karrigen. Ngado shkoni do të keni protestën që ju ndjek dhe protestë madhështore në 28 nëntor.  Fundi do të jetë i shpejtë dhe i hidhur për këdo që i shërben në mënyrë të verbër atij që shkatërron të ardhmen e qytetarëve shqiptarë. Ju bëj thirrje të reflektoni që të mos jeni të radhës që përjashtoheni ose thjesht hiqeni nga listat e radhës, por reagoni në mbrojtje të dinjitetit të qytetarëve, tuajën dhe të mirës sa pa qenë radha juaj”, tha Zhupa.

Në përgjigje, deputetja e PS-së, Briseida Çakërri,  tha: “Ju nuk mund të flisni për armiq të brendshëm se nuk dini ku keni drejtuesin, mos u merrni me thashetheme partish por diskutojmë rendin e ditës”

“Ju shkon për shtat thënia e Ramës: hëngshit kokat e njëri- tjetrit”, vijoi më tej Zhupa. 

Deputetja e PS Evis Kushi, i sugjeroi të shohë situatën në PD.

“Mirë bëni që studuoni e lexoni plenumet e partisë së punës, edhe statutin e PS, se përvojë është, por në vend të merreni me partinë tonë merruni me tuajën, me demokratët, se i keni lënë jetimë, i keni lënë në mes të rrugës”, tha Kushi.

Rendit zhvillimet sipas orarit:
Ora 16:21
'Na kanë shtuar punën, por jo fondet', kreu i Arkivave kërkon më shumë para për vitin 2027: Na duhen 10 milionë lekë (VIDEO)

 

Drejtori i Përgjithshëm i Arkivave, Auron Rrokaj, kërkon më shumë fonde për vitin 2027, pasi institucionit i janë shtuar përgjegjësitë, por jo buxheti për t'i përballuar ato. Gjatë raportimit në Komisionin për Kulturën, Turizmin dhe Diasporën, Rrokaj kërkoi rikthimin e 10 milionë lekëve në tavanin buxhetor të institucionit, pas reduktimit të tij.

“Ligji na ka dhënë ngarkesa, por nuk na ka dhënë buxhetim për këto ngarkesa”, deklaroi Rrokaj gjatë diskutimit të projektbuxhetit për vitin 2027.

Ai shpjegoi se ndryshimet ligjore të vitit 2024 i kanë shtuar Arkivit të Shtetit përgjegjësinë për administrimin e arkivave të Ministrisë së Mbrojtjes dhe Ministrisë së Brendshme. Për këtë arsye, numri i punonjësve është rritur nga 135 në 174, ndërsa institucioni ka marrë përsipër edhe detyra të tjera, si trajnimi i punonjësve të rrjetit arkivor në të gjithë vendin, digjitalizimi i dokumenteve dhe inspektimet.

“Detyra ime ka të bëjë me kujtesën e kombit dhe nuk ka kujtesë që të konvertohet në vlerë monetare. Megjithatë, që të funksionojë institucioni, ka nevojë për një buxhet”, u shpreh ai.

Një tjetër shqetësim i ngritur nga Rrokaj lidhet me sigurinë e dokumenteve dhe të sistemeve online. Sipas tij, Arkivi ofron 100% të shërbimeve në internet, por 11 sistemet online kanë nevojë për kontrata mirëmbajtjeje, pasi niveli i ulët i sigurisë mund të sjellë ndërprerje të shërbimeve.

Ai kërkoi gjithashtu fonde për instalimin e kamerave të sigurisë dhe përforcimin e rrethimit të ambienteve ku ruhen dokumentet arkivore. Sa i përket digjitalizimit, Rrokaj tha se institucioni ka marrë detyrën për krijimin e një platforme që do të lidhë modulet e administratës publike për dokumentet, por realizimi i saj kërkon punonjës, fonde për paga dhe pajisje.

Ora 14:38
'Ju ftojmë të aplikoni tek 'Këshilltari që duam'”, Ramion Kurti ironizon Zhupën pas kritikave për Asamblenë e PS: Dorëzo mandatin se kot e ke (VIDEO)

 

Debati për Asamblenë e Partisë Socialiste vijoi në Komisionin e Kulturës, këtë herë mes deputetit socialist Ramion Kurtit dhe deputetes demokrate Ina Zhupa. Pas kritikave të kësaj të fundit, e cila e krahasoi mbledhjen e socialistëve me plenumet e Partisë së Punës, Kurti i është kundërpërgjigjur duke sjellë në vëmendje përplasjen mes Sali Berishës dhe Lulzim Bashës për selinë e PD-së. Kurti mbrojti mënyrën se si zhvillohen diskutimet brenda Partisë Socialiste, duke theksuar se në forumet e saj trajtohen problematika të ndryshme.

“Në forumet e PS-së diskutohet gjatë dhe gjerë për problematika të ndryshme. Lajm i mirë nga Asambleja e PS-së është platforma për ‘Këshilltarin që duam’. Ju ftojmë edhe të aplikoni. Dorëzo mandatin se kot e ke. Është një platformë që do ta afrojë më shumë këshilltarin dhe qytetarin”, tha Kurti.

Ndërsa për kritikat ndaj zhvillimeve të brendshme në PS, ai solli si shembull konfliktin e dikurshëm mes Berishës dhe Bashës për kontrollin e selisë së Partisë Demokratike.