POP 5

Lajmet më të lexuara të 5 minutave të fundit

Opinion

Ylli Pata: Defektet e avokatëve të 'Të Paprekshmëve'

Kur ambasadori Donald Lu përdori fabulën e filmit kult të Brian de Palma “Të Paprekshmit”, për të ilustruar rastin e homologëve të tyre në Shqipëri, kjo nuk kishte vetëm një kuptim simbolik.

Ylli Pata: Defektet e avokatëve të 'Të Paprekshmëve'

Familja Berisha

Ishte në fakt një krahasim mot ta mot, i situatës së Çikagove të gansterëve të fillim shekullit 20 me Shqipërinë e sotme.

Al Capone, dhe “kolegët” e tij sundonin qytetin nëpërmjet dhunës, korrupsionit e degradimit moral, duke ngritur kështu një sistem që nuk i prekte ata. Sepse, ata që duhet t’i preknin, ishin zgjedhur nga gangsterët për të mos e bërë. Madje edhe paguheshin për të, me një libër pagash të rregullt, të shënuar në një libër të madh që Al Capone e ruante me fanatizëm.

Gjithçka ndryshoi kur nga Uashingtoni erdhi një hetues federal i ri, i cili zgjodhi 5 bashkëpunëtorë të tij, duke i kaluar në një sitë të hollë. Ku së pari të mos ishin në librin e pagesave të Al Capones, jashtë sistemit që gansterët kishin krijuar. Eliot Nes, kështu quhej hetuesi federal i hyri në një farë mënyrë detit më këmbë. Gazetat, sallonet, elita me një fjalë e Çikagos, e quanin një klloun që nuk ka asnjë gjë në dorë. Kërkon vetëm të bëjë show e t’i shërbejë të fuqishmëve në Uashington.

Në këtë rrugë, hetuesit, i vranë tre nga njerëzit e stafit të tij, por në fund arriti të gjejë librin e pagesave dhe të arrestojë arkëtarin e Al Capone-s, i cili pranoi të fliste ngaqë nuk kishte rrugë tjetër. Nëse do të kishte shkuar te shefi i tij, do ta shkrinin në acid, ngaqë nuk ju duhej më.

Në fund, shkoi në gjykatë, e i kërkoi kreut të trupit gjykues që të ndryshojë jurinë, pasi ata që ishin aty ndodheshin në borderonë e bosit të mafias. Juria tjetër e dënoi Al Caponen për një krim të rëndë federal siç është evazioni fiskal, e siç dihet ai vdiq në burg.

Duke u kthyer në mjedisin tonë, përveç fundit të filmit që nuk e kemi parë ende, jemi thuajse identik në tekstin e shkruar vetë nga hetuesi që çoi para hekurave Caponen.

Sapo Donald Lu e hodhi këtë fabul në publik shpërthyen sulmet, insinuatat, akuzat, talljet, ofendimet e kërcënimet, shoqëruar me lajme të rreme pa fund e ditë për ditë.

Por, në fakt ja ku jemi; po përjetojmë një version shqiptar të “Të paprekshmëve”, ku siç ndodh gjithmonë ka dy palë që përplasen. Në rastin tonë janë prokurorët e SPAK dhe agjentët e BKH-së përballë “Të Paprekshmëve” dhe suitës së tyre që është e madhe.

Mjafton të shikosh këto ditë panelet televizive pas ndjekjes penale të Sali Berishës. Niveli i këtyre “avokatëve” nuk prek as minimumin e asaj çfarë pret publiku. Nuk njohin ngjarjen, nuk dijnë faktet, por përgjithësisht merren vetëm me fabulën se nuk duhet SPAK të hetojë një figurë si Sali Berisha, sepse sipas tyre: minohet stabiliteti, shkatërrohet opozita, do ketë luftë civile, atentate terroriste, vrasje politike e gjëra të tjera.

Të gjithë këto “avoketër”, kanë një problem të madh, pasi gjatë gjithë këtyre viteve në fakt janë trajnuar të jenë “prokurorë”. Të hartojnë akuza, të shpallin fajësi, e paralajmërojnë dënime. Madje edhe të sajdisin “prova” siç ka pasur rëndom këto vite, të cilët kanë marrë akronimin e “Babales” së famshëm, për arsye të ndryshme.

Jemi para një rasti vërtetë të bujshëm meqë është Sali Berisha në mes, dhe se kryeministri akuzohet se i ka dhënë një truall të shtetit, dhëndrit të tij, i cili ka fituar mbi 5 milionë euro nga zhvillimi i këtij truallit gjigand në mes të Tiranës.

Por në fund të fundit, është një rast kronike gjyqësore, ku palët-SPAK dhe Berisha me avokatët e tij ligjore, sapo e kanë nisur betejën e tyre.

Do të ishte normale, logjike, e në fund të fundit edhe rezultateve, sikur “avoketërit” e paneleve, të bënin realisht mbrojtjen e Sali Berishës për çështjen. Duke e lexuar, mësuar, e natyrisht pyetur avokatët realë. Në mënyrë që kur të nisë beteja e fortë ligjore e çështjes në gjykatë, njerëzit të jenë sa më të informuar.

Shikoni ç’ndodh me rastet e proceseve kundër Donald Trump apo djalit të presidentit Joe Biden në mediat amerikane. Palët, që përgjithësisht janë reporterë të drejtësisë, apo edhe avokatë, juristë e politikanë flasin për çështjen, e as nuk sulmohen prokurorë e gjyqtarë.

E mbani mend rastin “Babale”? Në panelet e darkës u fol me detaje, madje me hollësira më të vogla për një rast trafiku narkotikësh që nuk ekzistonte. Pasi në bisedë ishte një person fake që bënte zërin si vëllai i Fatmir Xhafës e tjetri Babalja i famshëm që sot jeton në kryeqendrën e Bashkimit Europian. E “regjisori” i filmit “Babale”? Një yll politik në ngjitje…

M.T/SI.E./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    16 Nëntor, 09:13

    Kush ka pension më të ulët bonus më të madh në fundvit? Si e vlerësoni?

Lajme të tjera



×

Lajmi i fundit

Zyrtari i lartë rus: Vendimi i Biden për Ukrainën mund të çojë në Luftën e Tretë Botërore

Zyrtari i lartë rus: Vendimi i Biden për Ukrainën mund të çojë në Luftën e Tretë Botërore

17 Nëntor, 22:58