‘Paralizohet’ juglindja, shembja e rrugës Librazhd-Pogradec bllokon qarkullimin! ARRSH udhëzon drejtuesit: Përdorni këto rrugë alternative... (VIDEO)

Aksi Librazhd-Prrenjas 

Për shkak të trafikut të rënduar, si pasojë e bllokimit të aksit Librazhd-Prrenjas, Autoriteti Rrugor Shqiptar (ARRSH) ka dhënë udhëzime për qytetarët, që të përdorin rrugë alternative.

Njoftimi

Duke marrë shkas nga situata e rënduar e trafikut, si pasojë e bllokimit të aksit nacional Librazhd–Prrenjas (në vendin e quajtur “Arrat e Gurrës”), ARRSH, për t’i ardhur në ndihmë drejtuesve të mjeteve, sugjeron përdorimin e akseve alternative si më poshtë:

Për autoveturat:

Maliq – Lozhan – Strelc – Gramsh – Elbasan

Qafthanë – Pogradec – Korçë – Leskovik – Përmet – Tepelenë

Për mjetet e tonazhit të rëndë:

Pika doganore Qafë Thanë – Maqedoni – Pika doganore e Bllatës – Rruga e Arbërit

Duke kërkuar mirëkuptimin e drejtuesve të mjeteve dhe të gjithë banorëve të zonës, ju lutemi të ndiqni me kujdes sinjalistikën rrugore si dhe udhëzimet e Policisë Rrugore.

Faleminderit për bashkëpunimin.

Për shkak të rradhës në aksin Maliq - Moglicë, mësohet se policia ka bllokuar hyrjen e mjeteve që në hyrje të Maliqit. Pritet të zhbllokohet qarkullimi në Lozhan pasi atje ka ngecur një trajler dhe kalohet vetëm me një korsi. Kjo ka sjellë vështirësi në qarkullim pasi drejtuesit e mjeteve kanë fikur makinat duke pritur të hiqet trajleri. Bëhet fjalë për qindra mjete të cilët po i drejtohet Tiranës, mes tyre ka familjarë dhe fëmijë. Gjatë debatit me efektivët, një zonjë humbi ndjenjat.

“Mos kesh rrugë të ikësh në shtëpi. Më gjeni rrugën nga të iki në shtëpi”, është shprehur ajo përpara se të humbë ndjenjat dhe të pranishmit t’i vinin në ndihmë.

Aksi Maliq-Gramsh është bllokuar nga trafiku kilometrik, kryesisht i makinave që udhëtojnë nga Korça drejt Tiranës. Ky aks u sugjerua si rrugë alternative për shkak të shembjes së rrugës Librazhd-Pogradec. Në aksin Maliq-Gramsh u raportuan të bllokuara 3 trajlera, ndonëse thirrja e Autoritetit Rrugor Shqiptar vlente vetëm për mjetet e vogla.

Fillojnë problemet e para në qarkullim në segmentin alternativ që Autoriteti Rrugor Shqiptar vendosi vetëm për autoveturat, pas shembjes së rrugës Librazhd-Përrenjas.

Mësohet se në zonën e Moglicës kanë mbetur të bllokuar tre trajlera ku sipas informacioneve deri më tani është e pamundur të bëhet hapja e qarkullimit për shkak të këtij bllokimi.

Trajlerat mësohen se kanë kaluar nga Elbasani dhe janë lejuar nga policia e Librazhdit të kalojnë në këtë segment. Policia e Korçës ndërkohë ndodhet në vendngjarje, me forca të shtuara në mënyrë që të gjendet një zgjidhje për hapjen e qarkullimit.

Pavarësisht lajmërimit që prej mëngjesit të kësaj të shtune për bllokimin e rrugës në aksin Librazhd–Prrenjas, qytetarët sërish kanë zgjedhur të udhëtojnë drejt juglindjes.

Është krijuar radhë kilometrike e automjeteve, pasi rruga është bllokuar në vendin e njohur si “Arrat e Gurrës”.

Rruga u mbyll pa afat, pasi rrëshqitja e dherave po rrezikonte shembjen e urës. Kreu i ARRSH-së u bëri thirrje qytetarëve ta shmangin këtë rrugë, pasi do të mbeten të bllokuar në radhë pritjeje.

Në njoftimin zyrtar, ARRSH u bën thirrje qytetarëve ta shmangin këtë aks dhe të përdorin rrugën alternative Maliq–Lozhan–Moglic–Gramsh–Elbasan deri në stabilizimin e plotë të situatës.

Rruga Maliq–Gramsh, e cila prej ditës së sotme po shërben si aks alternativ për lidhjen e juglindjes me Elbasanin dhe më tej me Tiranën, po përballet me dëmtime serioze në trupin e saj. Gjatë ditës së sotme janë evidentuar plasaritje të thella në disa segmente, duke krijuar vështirësi të ndjeshme në qarkullim dhe rrezik të shtuar për drejtuesit e mjeteve.

Ky aks rrugor ka shfaqur problematika edhe më herët, por ditët e fundit amortizimi është përkeqësuar ndjeshëm, në një kohë kur mbetet e vetmja rrugë e hapur që siguron lidhjen e qarkut të Korçës me Tiranën. Aktualisht ka nisur qarkullimi i mjeteve duke rritur kështu fluksin në këtë rrugë.

Prej mesditës së të shtunës, qarkullimi në rrugën nacionale Librazhd-Elbasan është bllokuar pasi situata u përkeqësua, me zhvendosje të trupit të rrugës.

Për këtë shkak, shumë banorë të zonës nuk kanë pasur mundësi lëvizjeje me makinë ose autobusë, ndaj janë detyruar të ecin në këmbë 1 orë e gjysmë, për të shkuar në banesën e tyre në Prrenjas.

“Në Prrenjas, në Rrajcë. Çfarë të bëj? Të marr ndonjë makinë të më marrë. Këtë rrugë kemi, çfarë të bëjmë, të rrimë këtu?", tha i moshuari.

"Çfarë të them, jam e sëmurë, jam me një veshkë. Nuk eci dot në këmbë. Kam që nga Librazhdi, 1 orë e gjysmë që eci në këmbë”, u shpreh e moshuara.

Ndërkohë që Autoriteti Rrugor Shqiptar u bën thirrje drejtuesve të mjeteve të përdorin aksin Lozhan–Moglicë–Gramsh si rrugë alternative pas bllokimit të aksit Librazhd-Pogradec, ky segment paraqitet me dëmtime të shumta në trupin e rrugës, duke e bërë qarkullimin të vështirë dhe problematik.

Kjo thirrje vjen pasi ARRSH njoftoi bllokimin e qarkullimit në aksin Librazhd–Pogradec, në vendin e quajtur Arrat e Gurrës, për arsye sigurie.

Megjithatë, drejtuesit e mjeteve që orientohen drejt itinerarit alternativ përballen me një tjetër problematikë, pasi edhe ky aks rrugor ka nevojë për ndërhyrje dhe përmirësim të menjëhershëm.

Me një gjatësi prej 18.8 kilometrash, rikonstruksioni i kësaj rruge kushtoi rreth 1 164 381 419,00 lek (12 milionë euro). Investitori është Autoriteti Rrugor Shqiptar, ndërsa punimet u realizuan nga kompania Gjikuria sh.p.k. e cila ka ende brenda garancisë 1-vjeçare këtë aks kombëtar. Kjo është hera e dytë që në këtë segment raportohen probleme të ngjashme, çka shton dyshimet mbi cilësinë e punimeve.

Specialistët e xhenions në terren

Specialistët e Xhenios kanë nisur aksionin për zhbllokimin e aksit rrugor Uji i Zi – Tozhar, në territorin e Bashkisë Poliçan, pas rënies së gurëve.

Forcat e Armatosura po veprojnë në koordinim të plotë, duke shfrytëzuar të gjitha kapacitetet njerëzore dhe teknike, me qëllim përballimin e situatës dhe përfundimin me sukses të operacionit.

Si të mos mjaftonte rruga, një tjetër situatë problematike është shfaqur ne Librazhd me shtyllën e tensionit të lartë për shkak të rrëshqitjes së tokës. Pikërisht në vendin e quajtur Arrat e Gurrës, rrezikon të rrëzohet shtylla e tensionit të lartë 110 kilovolt Librazhd – Hidrocentrali Egnatia.

Në këtë linjë furnizohet me energji jo vetëm zonën e Librazhdit por është e lidhur edhe me Prrenjasin. Nëse ajo shembet, dy bashki mund të mbeten pa energji elektrike.

Zgjidhja alternative e parashikuar është furnizimi përmes nënstacionit të Prrenjasit, deri në stabilizimin e situatës. Specialistët e Operatori i Sistemit të Transmetimit (OST) kanë urdhëruar monitorim pandërprerje të situatës dhe planifikimin për devijimin urgjent të linjës së tensionit të lartë, për të shmangur çdo rrezik për jetën e qytetarëve. Pritet ndërhyrje e menjëhershme teknike për të garantuar furnizimin me energji.

Situata në vendin e quajtur “Arrat e Gurrës”, në aksin Librazhd-Prrenjas është përkeqësuar gjatë orëve të fundit për shkak të rrëshqitjeve të dheut.

ARSSH-ja ka bllokuar totalisht ndalimin e qarkullimin e automjeteve, përfshirë veturat, autobusët dhe kamionët.

Ndërkohë nga pamjet që ka siguruar Report Tv shihet se ura ka pësuar dëme të konsiderueshme. 

Poshtë saj betoni po thërrmohet, çka tregon një degradim të avancuar të strukturës mbajtëse dhe rrezik për të kaluar.