Kemi dëgjuar që klubet e futbollit të ndërpresin kontratën me lojtarët më së shumti për shkak të mbipeshës ose për arsye disiplinore, por së fundmi në listë është shtuar edhe një arsye sa e çuditshme por edhe qesharake.
Bëhet fjalë për një penallti me stilin ‘panenka’, e cila nuk shkoi ashtu siç pritej dhe si pasojë i ka shkaktuar ndërprerjen e kontratës futbollistit venezuelian Brendix Parra. Në ndeshjen e Kupës së Amerikë së Jugut mes Independiente de Campo Grande dhe La Equidad futbollisti humbi penalltinë e cila i kushtoi ekipit skualifikimin.
La Equidad kaloi më tej falë 11 metërshave dhe Parra humbi penalltinë e 4-3. Pas këtij episodi i menjehershëm ka qenë edhe reagimi i klubit, ndaj tani Parra është duke pritur për dëmshpërblimin e paracaktuar në kontratë.
Vetë presidenti i klubit të Independiente, Eriberto Gamarra, u tregua i sinqertë në një intervistë për ABC Cardinal raporton ‘Marca’, duke u shprehur: “Bordi i drejtorëve vendosi të ndërpresë kontratën me Brendix Parra për mënyrën se si goditi penalltinë. Nëqoftëse do të kalonin në raundin tjetër secili prej lojtarëve do të fitonte një shumë të majme parashë. Është një situatë e vështirë, por jeta vazhdon.”