Dhuna ndaj Sokol Mëngjesit, avokatët nga sot 3 ditë bojkot seancave gjyqësore në të gjitha gjykatat! Mbahen vetëm masat e sigurisë

Edhe avokatët e Elbasanit i janë bashkuar bojkotit 3 ditor, pas vendimit të Këshillit të Përgjithshëm të Dhomës Kombëtare të Avokatisë ditën e djeshme, (4 qershor) duke bërë që të shtyhen rreth 600 seanca.

Të veshur me togën e zezë, ata komunikuan vendimin në shenjë solidariteti ndaj kolegut të tyre Sokol Mëngjesi të dhunuar brutalisht më 29 maj në Tiranë.

Kreu i dhomës së avokatisë në Elbasan Demir Çiftja tha se ai dhe kolegët e tij janë ndjerë vazhdimisht të kërcënuar në punën e tyre, teksa thekoi se reforma në drejtësi ka dështuar.

“Ne si dhomë avokatie kemi protuestuar në mbështetje të vendimit që është marr dje nga këshilli kombëtar për bojkotin e seancave gjyqësore në Gjykatën e Juridiksionit të Përgjithshëm të Shkallës së parë Elbasan duke përjashtuar masat e sigurimit. Ne jemi të qëndrimit si dhomë avokatie se po vërtetohet fakti se reforma ka dështuar dhe këto janë pasojat e reformës dhe faktori politik ka lënë mënjan avokatinë, prandaj ne duhet të ngrejmë zërin për të drejtat tona. Të gjithë avokatët kërcënohen nga mënyra nga më të ndryshme nga klientët e tyre dhe kjo vjen si pasojë e reformës në drejtësi. Mbyllja e gjykatave në rrethe i ka bërë qytetarët më agresiv ndaj avokatëve”, tha ai.

 

GJKKO dhe Gjykata e Tiranës kanë shtyrë seancat që ishin përcaktuar për ditën e sotme, duke iu bashkuar bojkotit të seancave që po bëhet në vend.    

Këshilli i Përgjithshëm i Dhomës së Avokatisë në mbledhjen e së martës, 4 qershor vendosi të bojkotojë seancat gjyqësore për datat 5,6 dhe 7 qershor, duke përjashtuar seancat për masat e sigurisë.

Në Gjykatën e Posaçme Antikorrupsion këtë të mërkurë 14 seanca ishin paracaktuar për tu zhvilluar, ku pritet shtyrja e tyre për një datë tjetër', informon gazetarja e Report Tv Ketio Banushi.

Ndërsa, në Apelin e Posaçëm janë 7 seanca, në 2 prej të cilave shqyrtohen kërkesat e të pandehurve për ndryshim apo revokim të masës së sigurisë.

Ndërkohë, në Gjykatën e Tiranës janë 23 të tilla, përfshirë seancat për masa sigurie dhe të tjerat që janë në gjykim.

Shtyrja e seancave mund të shfaqë ngërçe, por edhe probleme sa i përket afateve.

Kreu i dhomës së Avokatisë Maks Haxhia në mbledhjen e së martës shprehu qartë se avokatët të cilët do marrin pjesë në seancat gjyqësore, duke përjashtuar ato për masat e sigurisë, do cilësohet shkelje e rendë dhe do vihen në lëvizje Komiteti disiplinor, i cili do marrë masa deri në heqjen e licencës.

Vendimi për të bojkotuar seancat për 3 ditë erdhi pas dhunës barbare ndaj avokatit Sokol Mëngjesi, i cili ndonëse ka kaluar një javë nga ngjarja e rëndë, është ende në rrezik për jetën.

 Edhe Dhoma e Avokatisë në Korçë i është bashkuar bojkotit të seancave.

Rreth 200 seanca gjyqësore do të pezullohen për 3 ditë, ndërsa arsyet e kësaj vendimmarrje kanë të bëjnë me solidarizimin për sulmin ndaj avokatit Sokol Mëngjesi, por jo vetëm.

Gjithashtu bojkoti i seancave lidhet me të gjithë problematikën që hasin avokatët gjatë punës së tyre, sidomos gjatë periudhën e reformës së re të drejtësisë dhe hartës së re gjyqësore, e cila ka sjellë shtim dhe të veprimtarisë se avokatëve.

Dhoma e Avokatisë në Shkodër i është përgjigjur bojkotit të seancave gjyqësore për 3 ditë me radhë, sipas vendimit që mori dje 3 qershor Dhoma e Avokatisë Shqiptare, pas sulmit që iu bë avokatit Sokol Mëngjesi, mëngjesin e 29 majit.

Janë rreth 130 seanca gjyqësore që nuk do të zhvillohen në këto 3 ditë, ku përjashtim ka vetëm për masat e sigurisë.

Këtë e ka bërë me dije Anton Kosteri, kryetar i Dhomës së Avokatisë Shkodër, në një prononcim për media ditën e sotme, i cili dënoi ashpër sulmin dhe kërkoi që personat përgjegjës të vihen para drejtësisë.  

“Dhoma e avokatisë Shkodër shpreh gjithë solidaritetin dhe mbështetjen institucionale, njerëzore dhe humane ndaj kolegut Sokol Mëngjesit, që ka rënë pre e një sulmi. Ne dënojmë ashpër sulmin ndaj kolegut tonë dhe i bëjmë thirrje institucioneve që të vënë para përgjegjësisë të personave përgjegjës. Ne kemi vendosur 3 ditë bojkot për të gjithë seancat gjyqësore, civile, penale dhe administrative, me përjashtim të atyre për caktimin e masës së sigurimit. Do respektohet vendimi i Dhomës së Avokatisë shqiptare. Në Dhomën e Avokatisë në Shkodër, janë rreth 50 ose 60 seanca në ditë që do të shtyhen tashmë”, tha ai.

Sa i përket raste të kërcënimeve ndaj gjyqtarëve, Kosteri tha se në Dhomën e Avokatisë Shkodër nuk  ka pasur raste të tilla.   

“Tek Dhoma e Avokatisë Shkodër nuk kemi pasur raste që të jetë cenuar integriteti i tij profesional ose të jetë kërcënuar për shkak të detyrës. Sulmi dhe dhuna nuk mund të zgjidhin problemet”, tha ai.