Një ngjarje e rëndë është regjistruar gjatë natës, rreth orës 02:30, në zonën e Fushë Dukatit, ku katër betoniere të tonazhit të rëndë janë përfshirë nga flakët brenda një pike prodhimi betoni.

Sipas burimeve paraprake, mjetet kanë qenë të parkuara në ambientet e nyjes së betonit në pronësi të Tanush Mëhillajt, në momentin e ngjarjes. Menjëherë pas sinjalizimit, në vendngjarje kanë mbërritur forcat e policisë dhe shërbimet zjarrfikëse.

Flakët janë përhapur me shpejtësi, ndërsa ngjarja ka ngritur dyshime të forta për zjarrvënie të qëllimshme. Efektivët e policisë dhe grupi hetimor kanë nisur menjëherë veprimet për zbardhjen e plotë të rrethanave të ngjarjes.

Burime nga policia bëjnë me dije se janë sekuestruar kamerat e sigurisë të kantierit, me qëllim sigurimin e pamjeve që mund të ndihmojnë në përcaktimin e shkakut të zjarrit dhe identifikimin e autorëve të mundshëm.

Hetimet vijojnë, ndërsa pritet që pamjet filmike të hedhin më shumë dritë për të përcaktuar nëse bëhet fjalë për zjarrvënie të qëllimshme për shkak të konflikteve të mundshme të pronarit, apo për një ngjarje aksidentale.

Ndërkohë, dëmet e shkaktuara në katër mjetet e tonazhit të rëndë janë të konsiderueshme. Edhe një ditë pas ngjarjes, betoniereve të parkuara në vendin ku u përfshinë nga flakët u duken qartë gjurmët e djegies, pasi mjetet janë shkrumbuar pothuajse totalisht.