/ATSH-Miranda Sadiku/.- Një aktivitet festiv është organizuar edhe në qytetin e Elbasanit në kuadër të ditës Botërore të Komunitetit Rom.
Qendra "Balashe", në bashkëpunim me bashkinë e Elbasanit kanë organizuar këtë aktivitet ku në fokus ishin fëmijët rom dhe të drejtat e barabarta që ata duhet të kenë me fëmijët e tjerë.
Në këtë aktivitet nuk ka mungur edhe kreu i bashkisë, Qazim Sejdini, i cili tha se "bashkia ka pasur gjithmonë nën përkujdesje komunitetin rom. Jemi e vetmja bashki në vend që në Këshillin Bashkiak kemi anëtarë të komunitetit rom që mbrojnë të drejtat e tyre. Kemi punuar shumë për këtë komunitet dhe do të punojmë edhe më shumë në të ardhmen".
Në vijim, duke kërkuar mbështetjen e të gjithë organizatave që operojnë në qytet për këtë komunitet Sejdini shtoi se, "kemi disa projekte për romët, më i rëndësishmi ndër ta është ndërtimi i 25 banesave për strehimin e tyre".
Projekte gjithashtu të rëndësishme janë ato të punësimit, shkollimit dhe integrimit të romëve. Të jeni të sigurtë që ju pret një e ardhme më e mirë," përfundoi Sejdini. Urime dhe falënderime kreu i bashkisë ka marrë edhe nga përfaqësues të këtij komuniteti, në veçanti për mbështetjen që i ka dhënë në lidhje me strehimin e tyre si edhe respektimin e të drejtave të tyre në përgjithësi nëpërmjet projekteve të ndryshme që ka ndërmarrë Bashkia më herët.
Madje ky komunitet ka shprehur mbështetjen e tyre në zgjedhjet lokale, pasi sipas tyre Qazim Sejdini njihet si kryetari, i cili ka mbështetur më shumë këtë komunitet në 25 vitet e fundit. Në këtë ditë të shënuar për ta ky komunitet feston në banesat e tyre madje edhe në lokale të ndryshme, duke e kthyer në traditë 8 prillin si ditë feste.