Tea Jahja dhe Klajvert Nazo, arritën të triumfonin në konkursin kombëtar Miss dhe Mister Turizmi 2023 që u organizua në Durrës me pjesëmarrjen e 40 konkurenteve nga mbarë vendi.

Spektakli i bukurisë Miss dhe Mister Turizmi 2023 kurorëzoi mbrëmjen e së mërkurës fituesit.

Kurora e më të bukurës i shkoi 16-vjeçares Tea Jahja, që pak muaj më parë u shpall edhe Miss Durrësi, ndërsa më i bukuri u shpall 18-vjeçari nga Tirana, Klajvert Nazo.

Mes emocioneve të shumta, dy adoleshentët folën për pritshmëritë pas spektaklit.

“Jam shumë e lumtur, shumë e emocionuar. Normal që e prisja. Si mund ta lëshoja kaq kollaj kurorën”, u shpreh Tea Jahja.

“Që nga fillimi që kam ardhur këtu kam gjetur rehati dhe në fund të ditës të arrija aty ku doja. Kam pasur ëndërr që i vogël që të filloja kinematografinë, të bëhesha model”, tha Klajvert Nazo.

Miss dhe Mister Turizmi 2023 u organizua nga producentja Myzejen Konduri me pjesëmarrjen e 40 vajzave e djemve nga qytete të ndryshme të Shqipërisë. Spektakti u shoqërua me ritmet e këngëve të Mateus Frrokut, Olta Bokës etj dhe valleve të ansamblit.

Një hapësirë e veçantë ishte rezervuar kulinarisë dhe trashëgimisë popullore, ku të gjithë konkurentët kishin përgatitur gatime tradicionale nga trevat e tyre.