Në Auckland, që është qyteti më i madh i Zelandës së Re, Viti i Ri u festua 12 orë para festimit në Tiranë. Por kjo nuk përbën ndonjë statistikë të veçantë. Ka shumë qytete europiane që kanë të njëjtën diferencë orare me Auckland. Gjëja që e lidh në mënyrë të veçantë Auckland me Tiranën është fakti se janë antipode perfekte gjeografike – nqs një sondë gjigande fillon shpimin në Tiranë, del tejpërtej në anën tjetër të globit në Auckland…

Meqë Auckland dhe Tirana kanë këtë lidhje gjeografike të veçantë, vlen të bëhen disa krahasime.

Në Aucland banojnë rreth 29% e popullsisë së Zelandës së Re. Në Bashkinë Tiranë banojnë rreth 25.5% e popullsisë së Shqipërisë. Në Auckland realizohet rreth 1/3 e Prodhimit të Brendshëm Bruto (PBB) kombëtar. Gjithashtu në Bashkinë Tiranë.

Por në Aucland PBB vjetore për frymë është 89 mijë dollarë amerikanë, ndërsa në Bashkinë Tiranë është vetëm 22 mijë për frymë.

Banesat në Auckland janë ndër më pak të përballueshmet në botë, bazuar në krahasimin e çmimeve mesatare të shtëpive me nivelet mesatare të të ardhurave familjare, dhe çmimet e shtëpive janë rritur shumë më lart se norma e inflacionit në dekadat e fundit. Gjithashtu në Bashkinë Tiranë.

Auckland shquhet në për sipërfaqen e madhe të parqeve natyrale, gjë që nuk mund të thuhet për Bashkinë Tiranë…

Megjithëse Auckland ka 4 linja metrosh dhe shumë linja autobuzësh, atje mbizotëron transporti me automjete private – vetëm 7% e udhëtarëve përdorin rregullisht linjat e autobuzëve dhe vetëm 2% linjat e metrove. Sidoqoftë, gjatë fundjavave dhe ditëve të pushimit, rritet ndjeshëm përdorimi i transportit publik. Për Bashkinë Tiranë nuk ka shifra të krahasueshme, por me sy të lirë kushdo mund të konstatojë lumenjtë e automjeteve private që e përmbysin trafikun e Tiranës (me përjashtim të gjysmës verilindore të Unazës së Madhe).

Në drejtim të energjisë elektrike, Auckland ka patur shumë probleme në të shkuarën, por pas ndërtimit të linjave të reja elektrike mbi e nën tokësore, furnizimi me energji ka qenë stabël në dekadën e fundit. Situata e energjisë është e ngjashme në Bashkinë Tiranë. (Auckland ka një sistem furnizimi me gaz për ngrohje familjare që Tirana nuk e ka).

Falë sipërfaqes gjigande të gjelbër në Auckland, niveli i ndotjes së ajrit është ndër më të ultët ndër qytetet e mëdha të botës (pavarësisht nivelit të lartë të përdorimit të automjeteve private). E njëjta gjë nuk mund të thuhet për Tiranën, sidomos në qendrën e saj.

Auckland ka 1 shkollë të ciklit 1-12 vjeçar për 3500 banorë. Pothuaj kaq ka edhe Bashkia Tiranë.  Në Auckland, 49% e banorëve nuk deklarojnë besim për ndonjë fe të caktuar (sipas Censit të vitit 2023). Në Bashkinë Tiranë kjo shifër është në nivelin  40%.