Elbasani marrëveshje binjakëzimi
me Liezhin për më shumë investime

ELBASAN- Bashkia e Elbasanit nënshkruan një marrëveshje binjakëzimi me bashkinë e Liezhit në Belqjike. Në kuadër të kësaj nisme në ambientet e bashkisë së Elbasanit u zhvillua një takim mes palëve, ndërsa përveç drejtuesve vendorë të dy qyteteve ishte e pranishme edhe ambasadorja e Belgjikës në vendin tonë, Anik Van Celster, kumbare e kësaj marrëveshjeje.
 
Kreu i bashkisë së Elbasanit, Qazim Sjedini, në fjalën e tij theksoi e cilësoi si të veçantë këtë bashkëpunim, teksa sipas tij do t’i hapet rrugë forcimit të marrëdhënieve dhe shtimit të investimeve në qytet.
 
Pierre Starast nënkryetar i bashkisë së Liezhit e konsideroi si të rëndësishëm nënshkrimin e kësaj marrëveshjeje, teksa shtoi se projektet e përbashkëta nuk do të mungojnë.
 
“Qytetet tona kanë shumë të përbashkëta në zhvillimin industrial, kulturor dhe universitar. Jemi mirëpritur në bashkinë e Elbasanit së bashku me një delegacion ekonomik. Delegacioni i biznesmenëve belge ka ardhur në emër të ministrit të Ekonomisë dhe së bashku shpresojmë të ndërtojmë projekte reale shumë të mira përsa i përket zhvillimit të mjedisit dhe fusha të tjera”, tha Pierre Starast.

Takimi ka vijuar më pas me një tryeze të rrumbullaket ku përfaqësues të kompanive belge janë njohur me qytetin e Elbasanit dhe mundësitë që ai ofron për investime. Ata kanë shprehur interes sidomos përsa i përket mjedisit dhe industrisë.

Redaksia Online
(e.s/shqiptarja.com)