Fier, dështon numërimi elektronik
instalohen pajisjet manual‏e

FIER- Edhe pse zyrtarisht nga KQZ nuk është shprehur për numërim manual të votave, në bashkinë Fier ka filluar instalimi i tyre në KZAZ-në Nr.60. Kjo KZAZ është vendosur në shkollën e mesme “Janaq Kilica”, ndërsa në zgjedhjet e tjera numërimi i votave është bërë në shkollën industriale “Petro Sota” në Fier .
 
Gjithsesi, në këtë KZAZ, komisionierët e saj kishin nisur nga puna. Janë 8 komisionierë, ku kryetari i saj është Neritan Lloshi i subjektit politik PD , ndërsa nënkryetar është Florjan Muçaj i subjektit politik PS.
 
Kryetari Neritan Lloshi është shprehur se komisionerët e kësaj KZAZ-je kanë nisur nga puna. Tashmë ata janë pajisur me dokumentat përkatëse, ndërkohë sa i përket logjistikës, ende nuk është instaluar interneti apo faksi ku do të punohet dhe do të kryen lidhjet me KQZ-në.
 
Ndërkohë, në sallën ku do të bëhet numërimi i votave janë instaluar pajisjet që do të numërojnë votat që do vijnë nga qendrat e votimit, çka tregon se sistemi elektronik i numërimit ka dështuar përfundimisht.
 
Sipas Lloshit janë gati 94 qendra votimi, ku gjashtë prej tyre janë në ambiente private.
 
Mbas verifikimit, në njërën prej tyre është konstatuar se ishte vendosur shtabi elektoral i LSI-së. Lidhur me këtë komisionierët e KZAZ Nr.59 vendosën largimin e saj nga ky vend. Për këtë është njoftuar KQZ, dhe është propozuar që kjo KZAZ të shkojë në lagjen “Sheq”. Ndërkaq, ende pritet vendimi i Komisionit Qendror të Zgjedhjeve.

Redaksia Online
(e.s/shqiptarja.com)

TAG:
• kqz