Filipçe apel qytetarëve: Respektoni protokollet, në të kundërtën orë policore

Rritja e konsiderueshme e numrit të rasteve të të infektuarve me Covid-19 në Maqedoninë e Veriut, ka bërë që vendi të paralajmërojë marrjen e masave të reja kufizuese, të cilat do t’i paraqiten parlamentit ditën e nesërme. Deklaratën e ka dhënë sot Ministri i shëndetësisë Venko Filipçe, i cili u bëri thirrje qytetarëve që të respektojnë masat, në të kundërtën sipas tij nuk përjashtohet mundësia që si hap i ardhshëm të jetë edhe ora policore.

“Nesër do të propozojmë edhe një masë, operatorët ekonomik të punojnë deri në ora 23:00, kufizim i kapaciteteve të transportit publik deri në 50 për qind, rekomandim deri tek gjykatat dhe komunat, procesi i punës të jetë me ndërrime apo edhe online, varësisht nga procesi i punës. Nesër në procedurë të shkurtër para deputetëve do jenë propozim ndryshimet e ligjit për mbrojtjen e popullatës nga sëmundjet infektive. Kufizimi i tubimeve familjare, është një pako që mund të ndikoj në uljen e numrit të të infektuarve. Më lejoni të drejtoj një apel tek qytetarët, situata është serioze, hapi i ardhshëm do të ishte kufizim i plotë i lëvizjes, gjegjësisht orë policore”, deklaroi Venko Filipçe, ministër i shëndetësisë.

Në Maqedoninë e Veriut, vetëm gjatë ditës së djeshme, 3 persona kanë ndërruar jetë dhe 594 të tjerë janë infektuar nga Covid-19.

TAG:
• Maqedoni e Veriut
• Koronavirus