Finalja e Conference League/ ‘Pa një biletë për ndeshjen nuk futeni në Tiranë’, thirrja e Veliajt: Protokoll si në vizitën e Bush dhe Papës

Për herë të parë në historinë e tij, kryeqyteti shqiptar do të presë një finale evropiane futbolli dhe Bashkia e Tiranës është përgatitur me të gjitha detajet që kërkon në ngjarje e tillë. Në prag të ndeshjes Roma-Feyenoord më 25 maj, kryebashkiaku Erion Veliaj dha disa porosi të fundit për grupin koordinues, që po merret me organizimin, si dhe disa këshilla për qytetarët e Tiranës, duke qenë se ajo ditë do të jetë pa makina. 

Veliaj e cilësoi finalen e Conference League si një mundësi fantastike për të prodhuar kartolinën më të bukur të qytetit dhe vendit tonë në arenën ndërkombëtare. Ai u kërkoi qytetarëve nga rrethet që, nëse kanë një udhëtim të planifikuar drejt Tiranës, ta shtyjnë atë për një ditë tjetër.

“Qyteti do të zbatojë të njëjtin protokoll që ka zbatuar edhe gjatë vizitës së Presidentit Bush apo Papa Françeskut, prandaj ju lutem, nëse nuk keni një biletë për të qenë në stadium, mos ejani në Tiranë, shtyjeni për një ditë tjetër, pasi nuk do të kaloni në asnjë prej disa kontrolleve të policisë, as në akset hyrëse të qytetit”, porositi ai. 

Veliaj kërkoi mirëkuptimin e qytetarëve të Tiranës që të mos e përdorin automjetin atë ditë, por të qarkullojnë në këmbë ose me biçikletë, teksa shtoi se transporti publik do të funksionojë.

“Ftesa ime për qytetarët e Tiranës është të lëvizim sa më shumë në këmbë. Kam nevojë për mirëkuptimin tuaj, na duhet ndihma e gjithsecilit. Transporti publik do të funksionojë, por mund të përdorim edhe biçikletat. Nëse dikush ka dëshirë të tregohet i dobishëm atë ditë, thjesht të mos e nxjerrë makinën”, tha kreu i Bashkisë.

Lidhur me sigurinë publike, Bashkia e Tiranës, në bashkëpunim me Policinë e Shtetit dhe policinë Bashkiake, ka marrë të gjithë masat e nevojshme.

“Janë zhvilluar takime edhe me ministrin e Brendshëm, Policinë e Shtetit, Policinë Rrugore dhe Policinë Bashkiake, por edhe me një ushtri me vullnetarë, të cilët kanë marrë përsipër të jenë edhe stjuardë, por edhe të lehtësojnë qarkullimin në qytet, për dikë që ka nevojë për shpjegime orientuese. Propozimi ynë është që ne t’i kalojmë të gjitha trupat në terren, sidomos në ato 24 orë, për të lehtësuar qarkullimin dhe shmangur ndonjë incident”, shtoi Veliaj. 

Nga ana tjetër, kryebashkiaku shpjegoi se qyteti po bëhet gati për të pritur tifozët që nuk do të bileta dhe do ta shohin ndeshjen jashtë stadiumit. Ai tha se Amfiteatri Veror i Liqenit dhe pedonalja “Murat Toptani” do të kthehen në Fan Zone për tifozët e Romës dhe Feyenoord, ndërsa sheshi “Skënderbej” do të presë tifozë neutralë, në mënyrë që edhe ata që nuk kanë bileta, ta shijojnë ndeshjen me po të njëjtën atmosferë si në stadium.

“Kemi përgatitur tre fan zona: Për të gjithë ata qytetarë që kanë pyetur se ku mund ta shohin ndeshjen nëse s’janë tifozë të Romës apo Feyenoord-it, vendi i duhur është sheshi “Skënderbej”, ku do të jetë fan zona e përbashkët. Tifozët e Romës, të cilët identifikohen me pjesën jugore të stadiumit, do të mblidhen në zonën e Amfitetarit të Liqenit, kurse tifozët e Feyenoord do të hyjnë nga ana veriore e stadiumit dhe do të mblidhen te pedonalja e Tiranës”, theksoi ai.

Veliaj kërkoi bashkëpunimin e qytetarëve dhe bizneseve të Tiranës edhe sa i përket mbajtjes pastër të qytetit. Për shkak të volumit të madh të punës më 25 maj, ai u bëri thirrje qytetarëve që të shmangin hedhjen e mbeturinave.

“Ne do të kemi një volum shumë të madh të pastrimit, siç ndodh kur ka koncerte dhe aktivitete të mëdha. Kjo do të thotë se do na ndihmonte shumë që qytetarët të prodhojnë sa më pak ndotje, apo hedhje mbeturinash në datën 25 maj. Do të ishte mirë sikur hedhja e tyre të bëhet në datën 23 maj në darkë ose në 26 maj në mëngjes, që në datat 24-25 ta kemi vemendjen të dedikuar tek miqtë dhe jo tek problematikat tona të përditshme. Çdo qytetar mund të jetë i dobishëm, duke lënë makinën në shtëpi, duke mos ndotur, duke mos hedhur plehrat atë ditë, në mënyrë që skuadrat tona të pastrimit të fokusohen në zonën qendrore të Tiranës”, deklaroi ai.

Në fund të fjalës, Veliaj shprehu besimin se finalja do të jetë një festë e madhe për Tiranën, që përkon edhe me Kryeqytetin Europian të Rinisë.

“Mezi pres që ta kthejmë në një super festë për Tiranën, një super imazh për Shqipërinë. Ky është viti i Tiranës dhe duhet ta maksimizojmë si një mundësi që na vjen një herë në jetë ose të paktën një herë në gjeneratën apo në mandatin e Bashkisë sonë, për të dhënë më të mirën. Për këtë lipset jo vetëm skuadra e bashkisë, por skuadra e gjithë Tiranës”, nënvizoi kreu i Bashkisë. 

Finalja e Conference League, kompeticionit të UEFA-s që do të zhvillohet në Tiranë më 25 maj, pritet të sjellë mijëra tifozë nga Italia dhe Holanda. Ndërkaq, të gjitha biletat për të parë ndeshjen tashmë janë shitur nga UEFA.

Rendit zhvillimet sipas orarit:
Ora 15:13
Finalja e Conference League, Nano: Kush të mundet të shmangë Tiranën! Nuk do të lejojmë ‘huliganët’ të prishin imazhin’

 

Pas Veliajt, Policia e Shtetit njoftoi për masat në finalen e Conference League në 25 maj. Drejtori i Përgjithshëm Gledis Nano u kërkoi qytetarëve të shmangin ardhjen në kryeqytet të mërkurën, por megjithatë gjithë eventin e konsideron si festë.

“Këto ditë është thënë që në 25 maj do ketë një shtetrrethim. Dua t’u bëj me dije e t’u kërkoj mirëkuptim qytetareve që data 25 do jetë ditë feste. Do të jetë një aktivitet me përmasa shumë të mëdha. Policia ka sugjeruar dhe do të bëjë bllokimin e rrugëve. Do të kemi komunikime të tjera në vazhdim se cilat rrugë do të jenë të bllokuara”, tha Nano.

I pyetur nëse janë marrë masa për tifozët e Feyenoordit, të cilët njihen për trazira, kreu i Policisë së Shtetit tha janë marrë masat për ndarjen që në ardhje të dy tifozerive.

‘Është e vërtetë që tifozeritë kanë dhe ultras apo tifozë me tendenca të dhunshme e huligane. Por kjo është një ditë feste e duhet të jetë promovim i vlerave të qytetarëve evropianë dhe ne s’do lejojmë kurrsesi që një pakicë e vogël tifozësh, nën efektin edhe të pijeve alkoolike apo adrenalinës që shkakton sporti, të prishin imazhin e vendit tonë’, shtoi Nano.

Nano tha se jemi në kontakte të vazhdueshme edhe me partnerët tanë në Holandë dhe, me qëllim identifikimin e këtyre personave dhe masat do të jenë profesionale, që këto akte dhune të mos ndodhin në vendin tonë.

‘Do të jetë një sfidë që Policia e Shtetit do ta kalojë me shumë sukses’, tha ai.

Ora 12:18
Finalja e Conference League, trageti Durrës-Bari do të niset 5 orë me vonesë, ja arsyeja

Burime zyrtare nga porti detar i Durrësit bëjnë me dije se tragetet e linjës Durrës-Bari, ditën e finales Roma-Feinord nuk do të nisen si zakonisht, por 5 orë me vonesë, pra në orën 03.00 të mëngjesit të datës 26 maj.

Kjo në mënyrë që tifozët italianë të mund të udhëtojnë nga Tirana në drejtim të Durrësit pasi të ketë përfunduar ndeshja.

Dy tragetet e linjës kanë një kapacitet për 5 mijë udhëtarë. Nga 2500 secili.

K.T./M.Q./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Iris: 22/05/2022 02:21

    /Tirana-qytet i ndaluar/!!! Nje pyetje kam:Po tifozeve qe do te vine me makinat e tyre nga vendet respektive,apo te duan te levizin ne qytet me makina me qira,si do te levizin?

    Përgjigju
  • Lui: 21/05/2022 10:07

    Në rradhë të parë dua të them që është gjë e mirë që organizohen eventi të tilla dhe me këto dimensione. Por nëse kjo ndodh me këtë çmim, atëherë ku është përfitimi i shoqërisë duke u privuar deri dhe nga gjëra minimale?! Kështu përfitojnë vetëm një grup i vogël biznesesh dhe kaq. Apo kot them dhe unë. S'ka asgjë për t'u habitur. Ka 30 vjet që këtu përfitojnë vetëm një grup njerëzish, e populli rri shikon TV.

    Përgjigju
  • Sondazhi i ditës:

    A i përballoni dot pushimet e verës me rritjen e çmimeve?



×

Lajmi i fundit

John

Vettingu, KPK konfirmon në detyrë gjyqtaren e Lezhës! Elsa Ulliri rezultoi e pastër në të tre kriteret e verifikuara