Zjarret masive dhe valët e të nxehtit që kanë përfshirë Francën, Spanjën dhe pjesë të tjera të Europës i kanë kushtuar deri tani mbi 3 miliardë euro ekonomisë këtë vit, sipas një analize të Financial Times. Vlera tregon koston e rikthimit të zonave të djegura në gjendjen e mëparshme dhe nxjerr në pah pasojat në rritje të zjarreve të lidhura me ndryshimet klimatike.

Në dy muajt e parë të sezonit të zjarreve janë djegur pothuajse 500 mijë hektarë tokë. Vetëm pesë vendet më të goditura të Eurozonës – Franca, Spanja, Portugalia, Greqia dhe Rumania – kanë pësuar një kosto ekonomike prej 3.1 miliardë eurosh. Kjo është më e lartë se vlerësimi mesatar vjetor prej 2.5 miliardë eurosh për të gjithë Bashkimin Europian, sipas Komisionit Europian.

Llogaritjet bazohen në metodologjinë e përdorur nga Komisioni Europian dhe në përllogaritje të ngjashme të qeverisë franceze. Kostoja ndryshon nga një vend në tjetrin, pasi varet nga lloji i sipërfaqes së djegur dhe mosha e pyjeve.

Megjithatë, ndikimi ekonomik pritet të jetë edhe më i madh. Kompanitë e sigurimeve, familjet dhe bizneset vijojnë të përllogarisin dëmet në prona, kultura bujqësore dhe turizëm, ndërsa në të ardhmen priten edhe kosto të tjera, si rritja e primeve të sigurimit, pronat që nuk do të mund të sigurohen dhe shpenzime më të mëdha për pajisjet e zjarrfikjes.

Analiza nuk përfshin plotësisht as zjarret më të fundit në Greqi. Po ashtu, ende nuk janë llogaritur kostot e thatësirës, ndërsa niveli i ulët i ujit në lumenjtë Rajn dhe Danub po pengon transportin e mallrave dhe prodhimin industrial. Kompani gjermane si BASF, Covestro dhe Evonik kanë impiante përgjatë Rajnit.

Nivelet rekord të ulëta të Danubit pritet të çojnë në mbylljen e centralit bërthamor të Hungarisë, që furnizon pothuajse gjysmën e energjisë elektrike të vendit. Edhe Rumania ka ndalur një nga dy reaktorët e centralit bërthamor të Cernavodës, pasi të dy përdorin ujin e lumit për ftohje.

Sarah Meier, eksperte e ekonomisë së klimës në ETH Zurich, tha se kostoja reale ekonomike e zjarreve mund të jetë më shumë se trefishi i humbjes mesatare vjetore deri në 2.1 miliardë euro në Prodhimin e Brendshëm Bruto që ajo ka llogaritur për ekonomitë rajonale të Portugalisë, Spanjës, Italisë dhe Greqisë në periudhën 2011-2018.

“Nëse zjarret arrijnë në qytete, kostoja do të jetë shumë, shumë më e lartë”, tha Meier.

Në Francë, departamenti Gironde, një qendër e industrisë së mbrojtjes dhe hapësirës ajrore, u godit rëndë nga zjarret. Kompani si Safran, Dassault Aviation dhe ArianeGroup pezulluan përkohësisht prodhimin dhe evakuuan punonjësit.

Rajoni njihet edhe për prodhimin e verës. Vreshtat e Bordosë deri tani kanë shpëtuar kryesisht nga flakët, por mbetet e paqartë nëse tymi do të ndikojë te prodhimi. Dëme janë regjistruar edhe në kultivimin e gocave të detit në pellgun e Arcachon, ndërsa turizmi, që përbën 7% të ekonomisë së departamentit, vazhdon të përballet me ndërprerje.

Dhoma e Tregtisë dhe Industrisë së Gironde tha se të paktën 40 mijë biznese janë prekur drejtpërdrejt nga zjarret. Deri më 30 korrik, 19.500 prej tyre ishin mbyllur plotësisht, ndërsa mes 120 mijë dhe 150 mijë punonjës ishin në skemën e punës me orar të reduktuar të subvencionuar nga shteti.

Në Spanjë, zjarret arritën deri në 50 kilometra larg Madridit, duke djegur shtëpi, biznese dhe automjete në zona rurale. Organizata e fermerëve të vegjël Unión de Pequeños Agricultores y Ganaderos raportoi humbje paraprake në 18.500 hektarë tokë bujqësore, kryesisht kullota.

Pavarësisht këtyre dëmeve, ekonomistët vlerësojnë se ndikimi në Prodhimin e Brendshëm Bruto të vendeve nuk ka gjasa të jetë i madh. Sipas tyre, një pjesë e kostove, si shtrimet shtesë në spital për shkak të ndotjes së ajrit, nuk përfshihen në përllogaritjet ekonomike, ndërsa rindërtimi i financuar nga shteti dhe kompanitë e sigurimeve mund të rrisë përkohësisht aktivitetin ekonomik.

Megjithatë, siç thekson Sarah Meier, kjo nuk përfaqëson rritje reale ekonomike, por vetëm zëvendësimin e kapitalit të shkatërruar.