Fondet nga KQZ, e majta 
merr 4-fishin e së djathtës

TIRANE- Grupimi i partive në koalicione ka ndikuar drejtpërdrejt në sasinë e fondeve që dy kampet kanë marrë nga buxheti i shtetit si paradhënie për shpenzimet elektorale për zgjedhjet vendore. Sipas vendimit të Komisionit Qendror të Zgjedhjeve marrë këtë muaj, janë 61 parti të cilat janë financuar, nga të cilat 15 janë të koalicionit të majtë, 39 të djathtë dhe 7 të tjera të pavarura. Koalicioni i mazhorancës i zgjeruar në numër partish pjesëmarrëse, ka marrë më shumw se 4 fishin e partive të koalicionit opozitar.

Konkretisht, koalicioni i majtë ka marrë 47,540,448 lekë, ndërsa i djathti  ka marrë 13,503,609 lekë. Partitë jashtë koalicionit, si PDBDNJ, PSD, PKD, etj, kanë marrë gjithsej 39’55’943 lekë. Gjithsej, me vendim të kuvendit janë vënë në dispozicion të partive 65 milionë lekë të reja.

Ato i marrin këto parti si paradhënie dhe në fund të zgjedhjeve, do t’i nënshtrohen auditimi nga KQZ-ja për të justifikuar se për çfarë i kanë harxhuar këto para. Një e treta e këtyre fondeve ka shkuar për partitë jashtë parlamentare dhe gati 2/3 e tyre për partitë parlamentare. Praktikisht 44,353,728 lekë shkojnë për 6 partitë parlamentare, ndërsa 20,646,272 lekë  shkojnë për 55 të tjera jo parlamentare. Këto janë fondet që partitë politike marrin nga buxheti i shtetit.

Fondet e tjera
Përveç 65 milionë lekë të vjetra që partive u ka dhënë shteti për këto zgjedhje, ato kanë dhe burime të tjera të lejuara me ligj nga të cilat mund të fitojnë të ardhura. Këto burime duhet të jenë gjithmonë transparente, por për partitë shqiptare kjo duket një praktikë e largët për t’u arritur. Burimet e financimit të fushatës për subjektet zgjedhore janë: fondet e dhëna paradhënie nga Buxheti i Shtetit për partitë politike të regjistruara si subjekte zgjedhore;të ardhurat e vetë subjektit zgjedhor të krijuara sipas ligjit; dhuratat në vlerë monetare, natyrë ose shërbime të dhëna; kreditë e marra nga partitë politike sipas ligjit.

Fondi i përcaktuar me vendim të Kuvendit u ndahet si paradhënie partive të regjistruara si subjekte zgjedhore me 95 për qind e fondit i shpërndahet partive politike të regjistruara si subjekte zgjedhore, të cilat kanë përfituar jo më pak se 0,5 për qind të votave të vlefshme në zgjedhjet paraardhëse, ndërsa 5 për qind e fondit i shpërndahet partive politike që janë regjistruar si subjekte zgjedhore. Subjektet zgjedhore mund të marrin fonde, për qëllime të fushatës së tyre zgjedhore, vetëm nga persona fizikë ose juridikë vendas. Shuma që çdo person fizik ose juridik mund t’i japë një subjekti zgjedhor nuk mund të jetë më e madhe se 1 milion lekë ose kundërvlefta në sende ose shërbime.

Kodi Zgjedhor ndalon dhënien e fondeve nga një person juridik apo çdo aksionar i tij, nëse ka përfituar fonde publike, kontrata publike apo koncesione në 2 vitet e fundit me vlerë mbi 10 milionë lekë; ushtron veprimtari në fushën e medies; ka qenë partner me fonde publike në projekte të ndryshme apo ka detyrime monetare ndaj Buxhetit të Shtetit ose ndaj çdo institucioni publik.



Shkrimi u botua në Shqiptarja.com (print) në 21 Qershor 2015

Redaksia Online
(d.a/shqiptarja.com)

TAG:
• kqz