Inspektorati i Mbrojtjes së Territorit dhe Bashkia Tiranë kanë filluar sot në mbrëmje me prishjen e ndërtimeve që preken nga projekti 'Unaza e Madhe', duke i hapur rrugë kështu realizimit të saj. Lajmi është bërë i ditur nga kryebashkiaku i Tiranës, Erion Veliaj, i cili shpreh më tej mirënjohje për familjet e para që u zhvendosën dhe pranuan të lirojnë banesat e tyre.
“Mirënjohje 2 familjeve të para që pranuan sonte prishjen e 2 banesave pa leje në 'Unazën e Re' në shkëmbim të banesave sociale. Më mirë për ato të 2-ja e më mirë për 200 mijë shoferë që do kenë 'Unazën'. Një qytet që s’ka të humbur e që s’e lejon politikën të përdorë! FORCA!”, shkruan kryebashkiaku Veliaj në llogaritë e tij personale nëpër rrjetet sociale.
Makineritë e rënda të IMT-së dhe Bashkisë Tiranë po bëjnë shembjen e ndërtimeve dhe zhvendosjen prej aty të inerteve. Ky aksion do të vazhdojë edhe në ditët në vijim për të bërë mundur realizimin e projektit që do zhvillojë, jo vetëm gjithë zonën e 'Astirit', por do të sjellë dhe një çlirim të trafikut në një nga zonat më problematike të Tiranës.
Kryebashkiaku Veliaj u ka bërë edhe sot thirrje banorëve të zonës së 'Astirit' që të distancohen nga përdorimi politik që po u bën opozita dhe të aplikojnë sa më parë pranë Bashkisë Tiranë për të përfituar nga programet sociale. Ai ka bërë të ditur se për të gjitha familjet që ndërtesat i kanë me leje do të shpronësohen sipas parashikimeve që bën ligji, ndërsa për ata që s’kanë dokumente pronësie do të ofrohet mbështetje sociale, duke filluar që nga bonusi i qirasë e deri te banesat sociale. Gjatë ditës së sotme, ai inspektoi disa nga banesat sociale në Shkozë të cilat janë bërë gati të presin familjet e zonës së 'Astirit'.
Për të 23-n ditë me radhë, disa nga banorët e 'Unazës së Re' bllokuan paraditen e sotme rrugën për më shumë se një orë, ndërsa protesta u mbështet si gjithmonë nga deputetët e opozitës. Rruga u bllokua nga ora 17:00- 18:00, ndërsa banorët firmosën një peticion drejtuar Kryeprokurores së Përgjithshme të Përkohshme Arta Marku për të liruar nga burgu të arrestuarit dhe ndërprerjen e punimeve. Përgjatë këtyre 23 ditëve, banorët e 'Unazës së Re' kanë protestuar në mënyrë të dhunshme e të tensionuar kryesisht në zonën e 'Astirit', sheshin 'Shqiponja', përpara Bashkisë së Tiranës dhe përpara Kuvendit, nga ku ngelën të plagosur 15 efektivë policie dhe 3 qytetarë. Për protestën e zhvilluar përpara Kuvendit, u shoqëruan në komisariat 20 persona, midis të cilëve 3 janë lënë në burg. Bëhet fjalë për Dorjan Protoduari, Ilias Sketiraj dhe Daniel Drobaj, i cili sipas prokurorisë hodhi kapsollën që plagosi policen Ina Nuka. Qëllimi i protestave të njëpasnjëshme ka qenë një e vetme: kërkesa për t'u dëmshpërblyer për shtëpitë të cilat do të preken nga projekti i 'Unazës së Madhe'.
