Autoritetet meksikane kanë arrestuar një të dyshuar për trafik droge që luajti një rol kyç në operacionin që çoi në vdekjen e bosit të drogës, Nemesio Oseguera muajin e kaluar, njoftoi të dielën Ministria e Mbrojtjes.

Oseguera, i njohur me nofkën “El Mencho”, drejtonte kartelin Jalisco (CJNG) dhe u plagos për vdekje gjatë një operacioni të trupave elitare meksikane më 22 shkurt, pasi ishte parë me një grua në një klub golfi në Jalisco.

Autoritetet meksikane kanë arrestuar Jose N, i njohur me nofkën “El Pepe”, i cili ishte përgjegjës për transportimin e partneres së Osegueras drejt një kabine luksoze në komunën Tapalpa, thuhet në një deklaratë të Ministrisë së Mbrojtjes.

Shërbimet e inteligjencës ushtarake arritën të gjurmonin Osegueran pasi zbuluan takimin e tij, thanë autoritetet pas operacionit. Sekretari meksikan i Mbrojtjes, gjenerali Ricardo Trevilla, kishte deklaruar më parë se vendndodhja e saktë u konfirmua nga “informacione shtesë shumë të rëndësishme” të siguruara nga inteligjenca amerikane.

“El Pepe” konsiderohej një nga operatorët kryesorë logjistikë të CJNG dhe u arrestua në komunën Tlajomulco në Jalisco.

“Atij iu sekuestruan drogë, armë dhe një automjet”, thuhet në deklaratën e Ministrisë së Mbrojtjes.

Oseguera ishte personi më i kërkuar në Meksikë dhe kërkohej gjithashtu nga Shtetet e Bashkuara, të cilat kishin vendosur një shpërblim prej 15 milionë dollarësh për kapjen e tij. Ai ishte “prioritet për DEA dhe për zbatimin federal të ligjit në SHBA”, kishte thënë në vitin 2019 një agjent i DEA.

Pas vdekjes së tij, anëtarët e CJNG bllokuan rrugët në 20 prej 32 shteteve të Meksikës dhe dogjën automjete dhe biznese, përfshirë në Guadalajara dhe në resortin turistik të Puerto Vallarta në Jalisco.

Mbi 70 persona, përfshirë 25 trupa të Gardës Kombëtare meksikane, u vranë gjatë operacionit për kapjen e Osegueras dhe përplasjeve të mëvonshme mes forcave të sigurisë dhe personave të armatosur të CJNG.

Në fillim të këtij muaji, Oseguera u varros në një arkivol të artë, me kurora të mëdha lulesh dhe nën një prani të madhe ushtarake.