Fushata në PD, Selami e Basha
përplasen për lidhjet me Soros

Dy kandidatët që garojnë për kreun e PD, Basha dhe Selami kanë shkëmbyer replika në lidhje me marrëdhëniet e tyre me organizatën e Sorosit.
 
Gjatë prezantimit të platformave respektive para demokrateve korçare, njeri prej tyre i ka pyetur të dy kandidatët se cili ishte pozicioni i tyre në raport me Sorosin.
 
Selami është shprehur se nuk ka asnjë lidhje me këtë organizatë, ndërsa fakti, që bashkëshortja e tij punon për fondacionin e Xhorxh Soros, nuk ka asnjë ndikim në vendimmarrjen e tij.
 
Edhe Basha ka mohuar të ketë lidhje me multimiliarderin duke e konsideruar organizatën e tij si mbështetëse të socialistëve dhe Ramës.
 
Selami-Bashës: Ke marrë bursë nga Soros
Selami i ka kërkuar Bashës të tregohet i sinqertë dhe të tregoje, që bursën në Holandë e ka marrë pikërisht nga Sorosi.
 
Madje, Basha dhe Grida Duma, ka vijuar Selami e kane falenderuar publikisht Xhorxh Sorosin për mundësinë e studimeve dhe për këtë ka edhe filmime.
 
Por Basha nuk ka pranuar argumentin e Selamit duke u shprehur se bursa e tij nuk është financuar nga Soros, por nga një tjetër fondacion.

Basha përballë Selamit në Korçë
Por në njoftimin e Partisë Demokratike debati për Sorosin nuk zinte vend. Megjithatë risi është fakti që Basha dhe Selami bashkëbisedim dhe debatuan të dy para demokratëve të Korçës.
 
Basha duke justifikuar humbjen u shpreh se votat u blenë dhe se nuk do të bëjmë kurrë marrëveshje me krimin për të ardhur në pushtet. “Ne bëmë një fushatë qytetare, me program për t’i dhënë zgjidhje problemeve të rëndësishme të njerëzve”.
 
Ndërsa Selami tha se humbja ishte e paralajmëruar dhe se objektiv është rikthimi tek funksionimi demokratik brenda PD.
 
“Kur të fitojmë besimin e njëri-tjetrit, atëherË ne do të kemi të drejtë të na besojnë edhe votuesit tanë, simpatizantët tanë dhe qytetarët shqiptarë” deklaroi ai.
 
 Deklarata e Eduard Selamit
 Mendimi im është që kjo humbje nuk ishte e papritur. Kjo humbje kishte kohë që ne e shikonim si demokratë. Dhe nuk është humbja e parë dhe fatkeqësisht nëse nuk e shikojmë këtë humbje dhe të gjejmë shkaqet e saj, kam frikë se do ta kem shumë të vështirë të rikthehemi.
 
Mënyra për tu rikthyer është për ta parë në sy dhe për ti parë gabimet ashtu siç janë. Nëse do ta përmbledh me një fjali, arsyeja e humbjes tonë dhe e humbjes së shpresës së shqiptarëve është largimi nga demokratët. Fatkeqësisht, Partia Demokratike nuk funksionon më si parti demokratike e bashkëkohore dhe nuk ka demokraci të brendshme që ne meritojmë.
 
Eshtë për të ardhur keq. Me shumë prej jush njihemi që nga 90-ta. Ne jemi sot më pak demokratë dhe funksionojmë në mënyrë më pak demokratike seç kemi funskionuar në fillimet tona. Le të marrim një shembull.
 
 Unë kam qënë deputet dhe kam pasur nderin tu përfaqësoj ju në vitin 1992 në Korçë. Por keni qënë ju ata që keni dhënë aprovimin si degë që unë të vija e të kandidoja në emrin tuaj. Të gjitha propozimet atëhere kalonin përmes aktivit të degës me propozime nga seksioni, me propozime nga grupseksionet derisa shkonin deri lart. Fatkeqësisht ne u larguam nga kjo traditë.
 
Fatkeqësisht sot demokrati pyetet shumë pak ose aspak. Dhe kjo nuk është vetëm në degën ku unë jam, në degën në Tiranë por kjo është kudo sepse unë jam përditë me demokratët dhe komunikoj me ta. Unë mendoj se po ti rikthehemi demokratizimit të brendshëm, kur të fitojmë besimin e njëri-tjetrit, atëherë ne do të kemi të drejtë të na besojnë edhe votuesit tanë, simpatizantët tanë dhe qytetarët shqiptarë.
 
Për mendimin tim ky është thelbi i kësaj analize. Këtu duhet të rikthehemi. Duhet të rikthehemi tek vendosja e rregullave dhe funksionimi demokratik brenda vetes tonë. Nuk mund të jemi ne shpresë për shqiptarët dhe garanci që do të veprojmë në të njëjtën mënyrë për forcimin e shtetit ligjor kur ne shkelim rregullat e lojës tonë
 
Deklarata e Lulzim Bashës
Ne nuk bëmë dhe as nuk do bëjmë pakt me krimin për të ardhur në pushtet. Ne ishim partia e vetme që erdhi me një program, me një ofertë, me një alternativë, që erdhi nga nevojat e qytetarëve të cilat nuk i shfletuam gazetave dhe revistave dhe as nuk i shpikëm në laborator politik, por bashkë i prekëm këto 4 vite.
 
Me dhjetëra herë unë kam qënë bashkë me ju tek biznesi i vogël i Korçës, tek fasonët, tek prodhuesit, tek agrobiznesi, tek fermerët, tek pensionistët, tek studentët. Ka qënë kjo prekja e realitetit që e bëri programin tonë realist në problemet më akute që kërkonin zgjidhje.
 
E benin ambicioz në zgjidhjet që ofronin brenda filozofisë politike të së djathtës dhe plotësisht të realizueshëm dhe të buxhetuar. Por ç’rëndësi ka kjo, kur nuk ka proces, kur nuk ka zgjedhje. Kur pala tjetër nuk ofron asgjë. As program, as plan, as vizion. Sepse e gjithë fushata, ishte tek shitblerja e votes.
 
Nuk ka shqiptar që se kupton diferencën mes partive që shesin e blejnë votën dhe përdorin bandat dhe partisë së vetme që ka vlera, parime, ka program, ka zgjidhje. Kuotën morale ta bashkojmë me forcën tonë numerike dhe politike. Akti i parë, bashkimi i brendshëm.

Eduart Selami dhe Lulzim Basha sot në Korçë

dy.b/shqiptraja.com