Hapet gara për ndërtimin e godinave të reja për administratën, Rama: S’ka më miliona euro qira në vit për privatin, pronat shtetërore për institucione

TIRANË- Një konkurs ndërkombëtar me 10 studio prestigjioze është hapur për të ndërtuar 4 godina të reja për administratën publike. 10 studiot prestigjioze i paraqitën sot jurisë ndërkombëtare projektidetë për 2 prej godinave, të cilat do t’i hapin rrugë një qasje të re për ndërtimin e zyrave dhe krijimin e hapësira të reja të shërbimeve bashkëkohore për administratën publike.

I pranishëm ishte edhe kryeministri Edi Rama, i cili në fjalën e tij tha se këto projekte i përgjigjen nevojave dhe vizionit të ‘Shqipërisë 2030’. Rama tha se institucionet publike paguajnë miliona euro qira në vit për të ushtruar aktivitetin e tyre, por sipas Ramës këto ambiente nuk i përgjigjen vizionit për Shqipërinë 2023.

“Janë 10 finalistë të ndarë në 2 grupe, 5 për çdo grup, që përballë jurisë ndërkombëtare do të prezantojnë projekt idetë e tyre lidhur me 4 zhvillime të rëndësishme, të cilat janë 4 zhvillime që i hapin rrugë një faze të re, një qasje të re dhe pa diskutim edhe një roli të ri të shtetit në raport me pronën publike.

LEXO EDHE:
Në 500 faqe vetëm fillimi i përgjigjes nëse SHBA-të kanë apo jo fakte ndaj korrupsionit të Berishës!

Aktualisht sot për ta bërë të qartë për të gjithë ata që nuk janë të informuar në brendësi lidhur me këtë nisëm, institucionet publike paguajnë disa miliona euro në vit qera, për të ushtruar aktivitetin e tyre në mjedise që janë larg së qeni të denja për ambicien tonë të Shqipërisë 2030, janë larg së qenit të denja për atë çka meritojnë qytetarët të cilët shërbehen nga këto institucione, janë larg së qenit të denja për  kushtet në të cilat në fakt duhet të punojnë shërbëtorët e shtetit.

E përveçse janë miliona e miliona euro që shkojnë çdo vit për qera, janë një sërë institucionesh që vazhdojnë të ushtrojnë aktivitetin e tyre në godinat të cilat nuk kanë asnjë lloj vlere të asnjë natyre. Jo vetëm që nuk kanë asnjë vlerë arkitektonike, por paraqesin edhe probleme te vazhdueshme mirëmbajtje si rezultat i të qenit godina të vjetra të trashëguara nga periudha komuniste dhe njëkohësisht të përdorura për qëllime të reja që nuk përshtaten fare me ato mjedise", tha Rama. 

Në këto 4 godina të reja që pritet të ndërtohen për administratën publike, Rama tha se do të akomodohen një sërë institucionesh, rreth 25, që janë sot në nevojë të madhe për të pasur një vend të denjë.

“Faktikisht sot arkitektet janë thirrur të në ofrojnë idetë dhe projektet e tyre për të na dhënë mundësinë të ndërtojmë një kompleks të madh qeveritar, i cili do të akomodojë një numër të konsiderueshëm institucionesh dhe nga ana tjetër edhe një tjetër godinë publike ku do të akomodohen të tjera institucione që janë sot në nevojë të madhe për të pasur një vend të denjë për të gjitha kërkesat e tyre”, tha Rama.

Rama tha se shteti s’do japë me prona te privati, por me këtë ide të re shteti do të vendosë në dispozicion pronat publike dhe investitorët ftohen për të ndërtimin e projekteve. Kështu, Rama thotë se shteti si pronar i truallit do të përfitojë një infrastrukturë të re për institucione publike që ende rrinë në mjedise me qira, si Biblioteka Kombëtare.

“Faktikisht ajo që do të ndodhë falë agjencisë në fjalë, pra Korporatës Shqiptare të Investimeve është që shteti nuk do të dorëzojë më prona ashtu siç i ka dorëzuar në të shkuarën tek privatët, por do të futet në një rol po aq aktiv si përfaqësues i pronës së vet përmes AIC për të nxjerrë nga shfrytëzimi i pronave publike, të mira publike dhe natyrisht edhe për të nxjerrë përfitime financiare për vetë shtetin që do të shërbejnë për investime të mëtejshme.

Shteti vendos në dispozicion pronat publike dhe më pas fton në konkurs investitorë vendas e të huaj për ndërtimin e projekteve, nga ku shteti do të përfitojë si pronar i truallit një infrastrukturë të re për institucione publike që ende rrinë në mjedise me qira apo ende nuk e kanë selinë e tyre të shekullit të ri, si për shembull Biblioteka Kombëtare”, tha Rama.

2 prej godinave pritet të ndërtohen në rrugën ‘Sulejman Delvina’ dhe tjetra pranë bulevardit Zhan Dark, por ende nuk dihen se cilat institucione do të akomodohen aty.

Ndërkohë Elira Kokona, Drejtoreshë e Përgjithshme e Korporatës Shqiptare të Investimeve (AIC) tha se tre prej projekteve janë  ndërtimi i Korpusit të Sigurisë, ndërtimi i Bibliotekës Kombëtare dhe rijetëzimi i stadiumit “Selman Stërmasi” në bashkëpunim me Bashkinë e Tiranës.

Në miratimin në më pak se 9 muaj të akteve ligjore dhe nënligjore, të 2 partneriteteve ndërkombëtare, të një strategjie në proces dhe 25 marrëveshjeve të bashkëpunimit me institucionet publike, që janë përfitues direkt, sot jetësojmë dy projektet e para të investimit që do t’i hapin rrugën 3 projekteve investimi që janë ndërtimi i Korpusit të Sigurisë, ndërtimi i Bibliotekës Kombëtare dhe rijetëzimi i stadiumit “Selman Stërmasi” në bashkëpunim me Bashkinë e Tiranës, tha ajo.

TAG:
• edi rama
• administrata publike

Sondazhi i ditës:

DASH rithekson se SPAK është kyçi i luftës ndaj korrupsionit, jeni dakord?

• Po

  60.5%

• Jo

  25.7%

• Nuk e di

  13.8%

Vota total: 2773

Votat totale janë unike

• Sondazhi i ditës:

  DASH rithekson se SPAK është kyçi i luftës ndaj korrupsionit, jeni dakord?

  Po Jo Nuk e di