Haradinaj: Zgjedhjet me rëndësi
të heqim logon nga fletëvotimet

PRISHTINE- Kryetari i Aleancës për Ardhmërinë e Kosovës, Ramush Haradinaj thotë se është pro heqjes së logove të fletëvotimeve pasi zgjedhjet në veri janë më të rëndësishme.

Haradinaj ka deklaruar se vendimi për logo në fletëvotimet në zgjedhjet në veri është kompetencë e KQZ-së, por  ka edhe implikime politike.

Ai ka thënë se mbajtja e zgjedhjeve në veri është shumë e rëndësishme dhe për këtë mund të “gëlltitën” edhe kompromiset, siç është anashkalimi i çështjes së logos në fletëvotime
Lideri i AAK-së, këto komente i ka bërë gjatë një konference për media, ku ka vlerësuar se nëse arrihet të mbahen zgjedhjet në veri, Kosova do të fitojë shumë dhe për këtë ka thënë se duhet të angazhohen të gjithë dhe të bëhen edhe kompromise.

“Ndjeshmëria është e lartë dhe politike. Ne e dimë se vendimi është i KQZ-së, por prapë është çështje politike. Mendojmë se në një situatë të tillë duhet të jemi më të kujdesshëm. Po bëhet fjalë për integrimin e veriut dhe për disa “gëlltitje” të disa gjërave. Por, nuk duhet të nxitojmë dhe të ulemi shumë. Shpresojmë që ta gjejmë një formë t’i mbajmë zgjedhjet. Kosova do të fitojë nëse arrijmë t’i mbajmë zgjedhjet në veri. Për këtë çështje mund edhe të bëjmë kompromis, sa i përket çështjes së logos”, ka pohuar ai, informon kosovapress.

Në takimin që është duke u mbajtur në Bruksel mes Kryeministrit të Kosovës dhe atij të Serbisë, nuk është arritur marrëveshje sa i përket përdorimit të simboleve shtetërore në fletëvotimet e KQZ-së në katër komunat në veri

Redaksia online
(Suela Gera /shqiptarja.com)

TAG:
• kqz