Ministri i Jashtëm Ferit Hoxha ka zhvilluar një telefonatë me ministrin e Maqedonisë së Veriut, Timco Mucunski. Në një postim në X, ai shkruan se telefonata vjen në kuadër të përvjetorit të tragjedisë në Koçan duke shprehur solidaritet ndaj qytetarëve e institucioneve.

Hoxha shkruan se Maqedonia e Veriut është vend fqinj, mik, partner dhe aleat i çmuar i NATO-s, ndërsa nënvizon se integrimi europian i të dyja vendeve si dhe i Ballkanit Perëndimor, ka rëndësi stategjike.

Në këtë telefonatë, u riafirmua zbatimi i plotë i Marrëveshjes së Ohrit, ku Hoxha ka veçuar ligjin për përdorimin e gjuhës (shqipe) në institucionet shtetërore. Së fundmi, vijon bashkëpunimi mes vendeve për projektin e Korridorit VIII.

“Këtë mëngjes pata një telefonatë të parë të dobishme dhe produktive me kolegun tim Timco Mucunski, duke riafirmuar marrëdhëniet e shkëlqyera midis Shqipërisë dhe Maqedonisë së Veriut. Për ne, Maqedonia e Veriut nuk është vetëm një vend fqinj dhe mik, por edhe një aleat i çmuar i NATO-s dhe një partner i ngushtë rajonal.

Në përvjetorin e tragjedisë në Koçan, përsërita solidaritetin tonë dhe angazhimin e fortë të Shqipërisë për të qëndruar pranë institucioneve dhe qytetarëve të Maqedonisë së Veriut në momentet që kërkojnë solidaritet, mbështetje të ndërsjellë dhe bashkëpunim më të fortë rajonal.

Ramë dakord se integrimi evropian i dy vendeve tona – dhe i të gjithë Ballkanit Perëndimor – është me rëndësi strategjike dhe përfaqëson investimin më të mirë në stabilitet dhe siguri, si për rajonin tonë, ashtu edhe për Bashkimin Evropian.

Riafirmuam gjithashtu rëndësinë e madhe të zbatimit të plotë të Marrëveshjes Kornizë të Ohrit, gurthemel i bashkëjetesës ndëretnike dhe stabilitetit institucional në vend. Në këtë drejtim, nënvizova rëndësinë e zbatimit të Ligjit për Përdorimin e #Gjuhëve, duke përfshirë përdorimin e gjuhës shqipe në institucionet shtetërore, përmes zgjidhjeve që respektojnë parimet kushtetuese dhe pasqyrojnë karakterin shumëetnik të vendit.

Së fundmi, ramë dakord për rëndësinë e avancimit të bashkëpunimit për zbatimin e KorridoritVIII, një projekt kyç për lidhshmërinë dhe zhvillimin rajonal”, shkruan Hoxha.