I sekuestrohen 750 mijë € pasuri në Shqipëri 'biznesmeni' italian anëtar i Camorra-s, i dënuar për porositje të një vrasje

DURRES-Me kërkesë të prokurorisë janë sekuestruar 750 mijë euro pasuri e një 'biznesmeni' italian banues në lagjen nr. 13, në Plazh Durrës, pasi dyshohet se janë vendosur nga veprimtaria kriminale. Italiani të cilit i është sekuestruar pasuria është Ferdinando Muollo 56 vjeç, i dënuar me 8 vite burg në vendin fqinj si pjesë e konflikteve mes klaneve kriminale dhe porositës i një vrasjeje. Autoritetet e drejtësisë italiane kanë konfirmuar për drejtësinë shqiptare se 56-vjeçari është pjesë e klaneve camorriste në zonën e Napolit.

Operacioni i koduar 'Dentisti', sikur njihej italiani është finalizuar pas 18 muajsh hetime. Por cfarë 'biznesi' ushtronte italiani Ferdinando Muollo në Shqipëri? Nga hetimet ka rezultuar se italiani kishte hapur një klinikë dentare në Durrës, ndërsa është pjesë e disa shoqërive që ushtrojnë aktivitetin e tregtimit të medikamenteve dhe pajisjeve dentare, pajisjeve mjekësore-kirurgjikale për larje dhe dezinfektim ambientesh.

Në vitin 2015 ka regjistruar shoqërinë me objekt laboratore dentare. Muollo në klinikën e hapur në Durrës kishte ortak edhe italian tjetër dentist po italian, që ishte arrestuar më parë për gjobëvënie ndaj biznesmenëve në vendin e tij.  Ndërkohë që klinikën pak kohë më parë e kishte kaluar në emër të një vajze për të humbur gjurmët, por u zbulua nga autoritetet shqiptare. Pasuritë e sekuestruara përfshijnë 5 apartamente banimi, me sipërfaqe 413.8 m2, në Durrës, 13 garazhe me sipërfaqe 622.7 m2, në Durrës, 1 automjet me vlerë 40 000 Euro dhe afro 10 000 euro llogari bankare. Italiani me leje të përkohshme qëndrimi në Shqipëri aktualisht nuk ndodhet në vendin tonë, ndërsa vijojnë hetimet për dosjen.

Njoftimi i plote i Policise se Shtetit per sekuestrimin
Në hetimin për pastrim parash startuar 18 muaj më parë finalizohet operacioni për identifikimin, gjetjen dhe sekuestrimin, me qellim konfiskimin dhe rikuperimin e pasurive që dyshohet se janë përfituar nga veprimtaria kriminale.

Drejtoria për Hetimin e Krimit Ekonomik e Financiar në Departamentin e Policisë Kriminale dhe Sektori për Hetimin e Krimit Ekonomik në DVP Durrës, nën drejtimin e Prokurorisë së Rrethit Gjyqësor Durrës, në hetimin për pastrim parash, identifikuan, gjurmuan dhe sekuestruan pasuri, te cilat dyshohen se rrjedhin nga veprimtaria kriminale, vlera e të cilave përllogaritet në 750 000 euro.

Pasuritë dyshohet se jane përfitur nga aktiviteti kriminal i shtetasit italian F. M., 56 vjeç, i dënuar me 8 vite burg në Itali, si pjesë e konflikteve mes klaneve kriminale dhe porositës i një vrasjeje.

Në vijim të punës për gjurmimin, gjetjen, evidentimin dhe sekuestrimin e pasurive të përfituara nga veprimtari kriminale, strukturat e Hetimit të Krimit Ekonomik e Financiar në Departamentin e Policisë Kriminale në Policinë e Shtetit dhe seksioni i posaçëm në Drejtorinë Vendore të Policisë Durrës, bazuar në informacione nga agjencitë e zbatimit të ligjit nisën hetimet që në muajin prill të vitit 2018, në drejtimin e Prokurorisë së Rrethit Gjyqësor Durrës.

Nga puna gjurmuese policore dhe hetimet proaktive prej afro 18 muajsh, në bashkëpunim e nën drejtimin e Prokurorinë së Rrethit Gjyqësor Durrës, në kuadër të operacionit policor “Dentisti”, strukturat hetimore të Drejtorisë për Krimin Ekonomik e Financiar në Departamentin e Policisë Kriminale seksioni i Durrësit, gjatë operacionit policor “Dentisti”, arritën identifikimin, gjetjen dhe sekuestrimin e pasurive të luajtshme dhe të paluajtshme me vlerë të përllogaritur paraprakisht 750 000 euro. Pasuritë janë të shtetasit Italian F. M., 56 vjeç, i dënuar me 8 vite burg në Itali, si pjesë e konflikteve mes klaneve kriminale dhe si porositës i një vrasjeje.

Në këtë hetim, krahas bashkëpunimit ndërinstitucional ka patur bashkëpunim me partnerët italianë, si dhe ndërmjet Prokurorisë së Durrësit dhe të Napolit.

Prokuroria e Napolit, në përgjigje të kërkesës për asistencë ligjore të Prokurorisë Durrës, konfirmoi se shtetasi Italian F. M., 56 vjeç, lindur në Itali dhe banues në lagjen nr. 13, në Plazh Durrës, me shtetësi dhe kombësi Italiane është i dënuar nga autoritetet e drejtësisë italiane, si pjesë e klaneve kamorriste në zonën e Napolit, Itali.

Shtetasi italian F. M. ishte me leje qëndrimi në Shqipëri dhe ushtronte aktivitetin tregtar si vijon:

Në vitin 2012 ka regjistruar shoqërinë sh.p.k, me objekt prodhimi dhe tregtimi i medikamenteve dhe pajisjeve dentare, në Tiranë, me 50 % të aksioneve në pronësi të tij.

Në vitin 2015 ka regjistruar shoqërinë me objekt prodhimi dhe tregtimi i pajisjeve mjekësore-kirurgjikale për larje dhe dezinfektim ambientesh, ku 45 % të kuotave i posedon F.M.

Në vitin 2015 ka regjistruar shoqërinë me objekt laboratore dentare, ku F. M. ka 30 % të kuotave.

Më datë 29 tetor 2019, Gjykata e Rrethit Gjyqësor Durrës miratoi kërkesën e prokurorit të Rrethit Gjyqësor Durrës dhe vendosi sekuestron preventive të pasurive të paluajtshme dhe të luajtshme të shtetasit Italian F. M., vlera e të cilave paraprakisht përllogaritet 750 000 euro.

Këto pasuri përfshijnë:

•             5 apartamente banimi, me sipërfaqe 413.8 m2, në Durrës;

•             13 garazhe me sipërfaqe 622.7 m2, në Durrës;

•             1 automjet me vlerë 40 000 Euro;

•             afro 10 000 euro llogari bankare;

Strukturat e Hetimit të Krimeve Ekonomike e Financiare në Durrës kryen veprimet procedurale për sekuestrimin preventiv të pasurive të mësipërme.

Aktualisht, strukturat për Hetimin e Krimit Ekonomik e Financiar po punojnë në bashkëpunim me administratorët e Agjencisë së Administrimit të Pasurive të Sekuestruara e Konfiskuara, për t'i kaluar në administrim të tyre, në bazë të ligjit "Për Administrimin e Pasurive të Sekuestruara e të Konfiskuara".

TAG:
• Camorra
• pastrim parash
• Ferdinando Muollo