I riu i dënuar për vjedhje, martohet në burgun e Fierit

Një i burgosur që vuan dënimin në burgun e Fierit është martuar katër ditë më parë. Lajmi konfirmohet si nga burime brenda këtij burgu ashtu edhe nga zyra e gjendjes civile në Fier. Kristi K. nga Tirana, rreth 25 vjeç, po vuan dënimin me tre vjet e tre muaj burg për veprat penale të vjedhjes dhe shpërndarjes së lëndëve narkotike. Katër ditë më parë, vajza e cila u bë bashkëashortja e tij, së bashku me tre punonjës të gjendjes civile në bashkinë Fier kanë shkuar në burgun Fier për të kryer ceremoninë martesore. Pas ceremonisë, çifti ka shijuar ëmbëlsira dhe qëndruar për pak kohë bashkë.