Ibra harron modestinë: Kam shkruar historinë e PSG

“Unë bëj pjesë në rangun e njerëzve që kanë shkruar historinë e PSG“. Kaq ka mjaftuar që të deklarojë sulmuesi suedez, Ibrahimovic që të nisin reagimet e shumta. Sulmuesi njihet për golat spektakolarë dhe ndihmesën e jashtëzakonshme me golat e realizuar në fitimin e titujve nga PSG në Francë, por kurrsesi për modestinë e tij. Në vijim të intervistës së tij, sulmuesi deklaron se “Jam shumë i lumtur që ndodhem në një skuadër të tillë. Nuk ka qenë e lehtë por tani jemi në rrugën e duhur. Jam një nga të parët njerëz që kam punuar që klubi të ngjitet në nivelet më të larta. E dija që do të isha vendimtar për të ardhmen e PSG. Kur të largohem mund të them me plot gojën se kam dhënë një kontribut të madh për këtë projekt”. Suedezi u transferua te PSG në vitin 2012 për 20 milionë euro dhe në 150 ndeshjet e luajtura me të ka shënuar 120 gola duke fituar 3 tituj kampionë radhazi. Ibra pritet që të mbyllë karrierën në Francë te PSG edhe pse zërat janë shtuar që mund të provojë edhe Premier League pas Serie A dhe La Ligës. Megjithatë pengu i vetëm në nivel klubesh për suedezin është Champions League, të cilën nuk e ka fituar as me Juven, Milanin, Interin, Barcelonën, ndërsa tani shansi i fundit është PSG. Nga sulmuesi pret shumë edhe Suedia në Kampionatin Europian të Francës që do të zhvillohet në qershor, pasi në fazën e kualifikimit rezultoi vendimtar me golat e shënuar.