Incidenti në aeroportin e Shkupit, Kurti: Përvojë e rëndë për presidenten Osmani, do të ketë raport zyrtar për zbardhjen e çështjes

Kryeministri i Kosovës, Albin Kurti është në një vizitë zyrtare në Maqedoninë e Veriut, ku ka zhvilluar një takim me kryeministrin Hristijan Mickoski.

Në një intervistë për mediat, Kurti tha se në takim janë diskutuar disa tema me rëndësi për të dyja shtetet.

“Kishim një mori çështje e tema që diskutuam që janë për të mirën e dyanshme e të përbashkët. Kosova dhe Maqedonia kanë marrëdhënie të mira bilaterale, bazuar në vlera të përbashkëta me synim të qartë për integrim evropian. Urojmë që sa më shpejtë t’i fillojmë negociatat për në BE”, tha Kurti.

LEXO EDHE:
Mickoski shpreh keqardhje për incidentin në Aeroportin e Shkupit, Kurti pret raportin zyrtar

Më tej ai foli edhe për incidentin që i ndodhi presidentes së Kosovës, Vjosa Osmanit në aeroportin e Shkupit duke theksuar se pret që të zbardhet rasti për këtë ngjarje.

“Pa dyshim ka qenë përjetim dhe përvojë e rëndë e presidentes Vjosa Osmani, me dy gusht në aeroportin e Shkupit, ka qenë me familje dhe me dy vajza të vogla. Autoritet e Maqedonisë së Veriut, krerët e shteti këtu kanë shprehur keqardhje për rastin. Do të ketë raport zyrtar që do ta zbardhë këtë çështje, dhe ta kuptojmë se çfarë ka ndodhur dhe mos të përsëritet kurrë më një situatë e tillë”,shtoi Kurti.

Xh.K/A.A/Shqiptarja.com

TAG:
• Albin Kurti
• Hristijan Mickoski