Infrastuktura/ Shpallet fituesi për koncesionin e rrugës nga Miloti në Balldren

Pas Rrugës së Arbrit dhe autostradës Thumanë-Kashar, ministria e Infrastrukturës dhe Energjisë ka shpallur kompaninë fituese për ndërtimin e autostradës Milot-Balldren, si pjesë e paketës ‘1 miliard’. Kontrata e Partneritetit Publik-Privat do të ketë një vlerë prej 161.5 milionë eurosh, ndërsa parashikon ndërtimin, por edhe mirëmbajtjen për një periudhë 13-vjeçare.

Referuar formularit të fituesit, kompania që do të kryejë punimet është “A.N.K SHPK”, e cila kishte përfituar paraprakisht një bonus prej 8.5% të pikëve nga Këshilli i Ministrave për shkak të rezultatit teknik dhe financiar të propozimit të pakërkuar për këtë aks rrugor.

Kjo nuk është kontrata e vetme që kjo kompani ka fituar përgjatë dy viteve të fundit. Sipas të dhënave nga Open Data Albania, ajo ka nënshkruar pesë kontrata publike, si e vetme, ashtu edhe në bashkëpunim me kompani të tjera, ndërsa vlera totale e tyre llogaritet në rreth shtatë milion euro.

Segmenti Milot-Balldre do të ketë një gjatësi prej 18 km dhe shtrihet përgjatë aksit të rrugës që lidh Milotin me qytetin e Lezhës dhe devijohet si rrugë plotësisht e re, nga nyja e qytetit te Lezhës deri në Balldre, ku, më pas, lidhet me rrugën ekzistuese në drejtim të Shkodrës.

Pjesë e projektit është edhe ndërtimi i dy urave të mëdha mbi lumin Mat dhe Drin, një tuneli, si dhe disa veprave të vogla arti. Sipas ministrisë së Infrastrukturës dhe Energjisë, mendohet që kjo rrugë të jetë strategjike për vitet e ardhshme sa i përket zhvillimit të zonës së bregdetit veriperëndimor, ndërsa lehtëson komunikimin me Malin e Zi.

TAG:
• Koncesion
• MIlot-balldren