Fluksi i pacientëve te Infektivi, ISHP: Virozë sezonale, s'ka evidencë për përhapje të salmonelës

TIRANË-- Instituti i Shëndetit Publik ka deklaruar se fluksi në fillim të shtatorit në spitalin Infektiv në Tiranë ka ardhur si pasojë e virozës së stinës, duke theksuar se nuk ka evidencë për përhapjen e bakterit të salmonelës.  Pas analizave të bëra, ISHP-ja sqaron se nga analizat e kryera deri tani në mostrat e marra në paciente me shqetësime, vetëm 5 prej tyre kanë rezultuar me salmonelë, që do të thotë se nuk kemi të bëjmë me një përhapje të këtij bakteri, por me një virozë të stinës.

"Instituti i Shëndetit Publik sqaron se, nga analizat e kryera deri tani në mostrat e marra në paciente me shqetësime dhe shenja të traktit tretës, nga të gjithë rastet e  ekzaminuara, vetëm 5 raste kanë rezultuar me salmonelë, pra nuk rezulton evidencë për përhapje të këtij bakteri. Sipas të dhënave të IShP, nga analizat e mostrave të marra, rezulton se situata e ndodhur lidhet me temperaturat e larta, situatë e zakonshme sezonale, e krahasueshme me vitet pararendëse. Shtrimet ne shërbimin infektiv janë shumë të ulëta në raport me numrin e rasteve të paraqitura dhe fluksi aktualisht në këtë spital ka rënie të konsiderueshme. Instituti i Shëndetit Publik do të vijojë monitorimin e situatës, duke ritheksuar se rastet e shfaqura janë normale për sezonin dhe temperaturat aktuale dhe rekomandon zbatimin rigoroz të higjienës personale dhe kërkimin e ndihmës mjekësore në rast të shqetësime të kësaj natyre", njofton ISHP.

Në fillim të këtij muaji janë paraqitur në shërbimin e urgjencës së Infektivit rreth 200-230 raste, ku dyshimet e para ishin se kanë ardhur nga uji, por një gjë e tillë u mohua nga ISHP.  

B.K./Shqiptarja.com

TAG:
• salmonele
• Instituti i Shendetit Publik