Ish-ministri i LSI 'shigjeton' Kryemadhin: 5 vite në krye të partisë dhe vetëm kërkon ndjesë! Kjo opozitë ka shejtanin brenda, duhet ribërë nga fillimi

Ish-ministri i LSI-së, Ylli Manjani ka shigjetuar kryetaren e LSI-së, Monika Kryemadhi duke e bërë atë përgjegjësi për situatën në të cilin ndodhet kjo parti, që mundi të marrë vetëm 4 mandate në zgjedhjet e 25 prillit.

Me një postim në facebook, Manjani i referohet deklaratave të shumta të Kryemadhit e cila ka kërkuar ndjesë për djegien e mandateve, teksa shkruan se vetëm ndjesa nuk mjafton.  

Për Manjanin nuk është djegia e mandateve që dëmtoi opozitën, por 'faktet ulërasin se ajo e kjo opozitë kishte dhe ka ende shejtanin brenda'.

Sipas ish-ministrit, opozitën e ka dëmtuar vetvetja, kryetarokracia dhe mbyllja e plotë ndaj shoqërisë e nevojave të saj për përfaqësim real dhe se ajo duhet ribërë nga fillimi.

"Monika ka hyrë në vitin e pestë në krye të LSI dhe vetëm kërkon ndjesë. Ndjesë për LSI e Ilirit e ndjesë për LSI e vet. Ndjesa zakonisht pranohet, por që “djegia e mandateve dëmtoi opozitën” nuk më bind shumë. Faktet ulërasin se ajo e kjo opozitë që është sot, si në parlament ashtu edhe jashtë tij e kishte dhe ende e ka shejtanin brenda. Më mirë djepi bosh se shejtani brenda- thonë mirditorët. Ndaj them se më shumë sesa djegia e mandateve, opozitën e ka dëmtuar vetvetja; kryetarokracia;mbyllja e plotë ndaj shoqërisë e nevojave të saj për përfaqësim real. Opozita duhet ribërë nga fillimi. Ndjesa nuk mjafton…", shkruan ai.

TAG:
• LSI
• ylli manjani
• monika kryemadhi