Ish-oficeri i CIA-s, David Rush 49 vjeç, është deklaruar fajtor për mashtrimin e qeverisë amerikane në një skemë me vlerë rreth 200 milionë dollarë.

Rush akuzohet se përdori një program të fabrikuar dhe kontrata fiktive për të përfituar fonde publike, me të cilat bleu prona luksoze në Florida, makina, orë dhe pasuri të tjera. Gjatë kontrollit në banesën e tij, autoritetet gjetën 298 shufra ari.

Sipas dokumenteve të gjykatës, Rush kishte kërkuar dhjetëra miliona dollarë në ar dhe valutë të huaj, duke pretenduar se ishin për shpenzime pune. Një prej transfertave të dyshuara të mashtrimit ishte në vlerën 45 milionë dollarë.

Çështja ka edhe një dimension të sigurisë kombëtare. Rush ka pranuar se i dha një zyrtari të një qeverie të huaj informacione top sekret, përfshirë të dhëna mbi një burim njerëzor sekret të CIA-s. Prokurorët thanë se zbulimi i këtij informacioni mund të kishte rrezikuar jetën e burimit dhe zyrtarëve amerikanë.

Drejtori i CIA-s, John Ratcliffe, deklaroi se Rush “abuzoi me detyrën e tij dhe tradhtoi besimin e publikut”, duke theksuar se ai duhet të mbajë përgjegjësi për veprimet e tij.

Në kuadër të marrëveshjes së pranimit të fajësisë, Rush duhet të dëmshpërblejë qeverinë amerikane dhe të humbasë pasuritë e lidhura me skemën.