BERGAMO, Itali - Këtë javë, Alessandro Bastoni u përball me disa probleme jashtë fushës. Ndërsa mbrojtësi i Interit po luante në ndeshjen e Champions League kundër Kairat Almaty (2-1) të mërkurën në 'San Siro', hajdutët hynë me forcë në vilën e tij në Castelli Calepio, një qytet me 10 mijë banorë pranë liqenit Iseo, në provincën e Bergamos.

E gjitha ngjarja ndodhi në orët e vona të pasdites së së mërkurës, më 5 nëntor, kur të paktën katër kriminelë u ngjitën mbi portë dhe hynë në shtëpinë e futbollistit të Interit përmes një grile në sistemin e ventilimit. Siç raportohet nga 'Bergamonews', banda menjëherë shënjestroi dhomën e gjumit dhe dollapin.

Megjithëse një listë e saktë e sendeve të vjedhura ende mungon, thuhet se hajdutët kanë vjedhur çanta dore dhe ora të firmave të njohura, përfshirë dy Rolex. Keqbërërit (katër burra) kishin vetëm pak minuta për të kryer grabitjen, pasi alarmi u aktivizua sapo ata shkelën brenda vilës.

Për të shmangur identifikimin, hajdutët kishin veshur rroba të errëta me kapele dhe shall që ua mbulonte fytyrat dhe ikën para mbërritjes së forcave të rendit dhe personelit të sigurisë. Sipas raporteve të fundit, askush nga familja nuk ishte brenda vilës në kohën e grabitjes. Karabinierët e Grumello del Monte dhe Njësia Operacionale e Bergamos po hetojnë incidentin.