Rama në Kuvend: Dialog me opozitën e re për reformën zgjedhore, zgjedhjet në 2021

Pas 2 orësh dhe 30 minuta diskutime nga deputetët e shumicës dhe votimit të rendit të ditës është mbyllur seanca plenare e Kuvendit të Shqipërisë. Vëmendjen e ka tërhequr fakti që tre nga katër deputetët e rinj nga lista e LSI-së që u betuan sot në Kuvend votuan pro projektligjet e rendit të ditës. Aurora Mara, Edmond Rrushaj dhe Enver Roshi votuan pro për projektligjet, ndërsa Ylli Shehu votoi kundër.

RENDI I DITËS
Projektligji “Për një shtesë në ligjin nr. 8952, datë 10.10.2002, “Për letërnjoftimin elektronik të shtetasve shqiptarë”, të ndryshuar”

Projektligji “Për disa ndryshime dhe shtesa në ligjin nr. 125/2013, “Për koncesionet dhe partneritetin publik privat”, të ndryshuar

Projektligji “Për disa ndryshime dhe shtesa në ligjin nr. 10416, datë 7.4.2011, “Për materialin mbjellës dhe shumëzues bimor”, të ndryshuar

Projektligji “Për ratifikimin e marrëveshjes, ndërmjet palëve të Konventës së Bashkëpunimit Policor për Evropën Juglindore, për shkëmbimin e automatizuar të të dhënave të ADN-së, daktiloskopike dhe të të dhënave të regjistrimit të automjeteve, dhe marrëveshjes së saj zbatuese”

Projektligji “Për ratifikimin e marrëveshjes ndryshuese të marrëveshjes për bashkëpunimin teknik ndërmjet Këshillit të Ministrave të Republikës së Shqipërisë, të përfaqësuar nga Ministria e Zhvillimit Urban, dhe Qeverisë së Konfederatës Zvicerane, të përfaqësuar nga Agjencia Zvicerane për Zhvillim dhe Bashkëpunim, për programin e zhvillimit rajonal për Shqipërinë, ratifikuar me ligjin nr. 66/2017”

Projektvendim “Për miratimin e planit vjetor për zbatimin e programit të statistikave zyrtare 2017-2021”

Projektrezoluta “Për njohjen dhe mbështetjen e veprimtarisë së mbrojtësve të të drejtave të njeriut, në promovimin, nxitjen dhe mbrojtjen e të drejtave të njeriut dhe lirive themelore, forcimin e shtetit të së drejtës dhe konsolidimin e demokracisë”

Deputetja e PS-së, Ermonela Felaj nga parlamenti i bëri thirrje opozitës, ashtu si Rama për dialog, ndërsa lëshoi akuza drejt LSI-së. "LSI-ja është si ajo miza e kalit që ngjitet për interesat e veta" tha Felaj. Ndërsa Gjiknuri shtoi se opozita do destabilitet. "Hapësirë për dialog ka, por opozita ka hedhur farat për destabilitet. I them opozitës se ka shumë hapësira në Kodin zgjedhor, i ka të gjitha mundësitë për kompromis. Ky vend është shumë i vogël për t'u ndarë, po rrudhet" tha ai.

Rrugës për në Itali, kryeministri Rama përpos sqarimit në Kuvend ka bërë edhe një status në rrjetet sociale për të shpjeguar sërish qëllimin. "Në Itali 24 orë për të mbrojtur Shqipërinë,pas cënimit të rëndë që i'u bë përmes shfaqjes së turpshme të dhunës partiake të 16 shkurtit e në vazhdim,e cila kërcënon investitorët e planet e tyre dhe turizmin që punëson e ushqen dhjetëra mijëra njerëz.Për Shqipërinë FinoAllaFine" shkruan Rama.

Pas përfundimit të fjalimit në Kuvend, kryeministri Edi Rama u nis në një vizitë zyrtare në Itali. Gjatë fjalës në foltore, Rama tha se do të shkojë në vendin fqinj për të shpjeguar se ajo që po ndodh nuk është protestë popullore, por vetëvrasje e opozitës. "Do të shkoj matanë detit për të bërë përpjekjen time për ti shpjeguar Italisë cka kanë shfaqur lajmet, nuk është protestë popullore, por reagim brenda pallatit të politikës nga ajo pjesë e tërësisë së përfaqësisë së popullit shqiptar që për asnjë moment nuk pati sensin e realitetit dhe përfaqësimit dhe ajo që ndodh sot është vijimi i një rruge pa krye, ku e vetmja gjë e re është një vendim vetëvrasës i udhëheqjes së opozitës si rezultat i humbjes së shikimit mbi Shqipërinë. Jemi në kushtet e një sezoni të ri të një seriali të njohur. Si dy vite më parë kur në bulevard u ngri një çadër për një Republikë të Re për kushtin e panegociueshëm për një qeveri pa Ramën kryeministër dhe trazitore për të garantuar zgjedhje sipas dëshirës së atyre që sot janë larguar përfundimisht nga parlamenti" tha Rama.

Protesta e opozitës me djegie gomash para parlamentit dhe dhunën para Kryeministrisë sipas Ramës ka dëmtuar imazhin e vendit. Ai tregoi se cfarë i kishte thënë tenori i njohur Saimir Pirgu dhe një luleshitëse. "Saimir Pirgu më tha se më duhen 200 koncerte për të hequr nga mendja e njerëzve pamjen e gomës që digjej para kuvendit. Ndërsa një luleshitëse më tha se kjo është tufa e parë që po shes që nga 16 shkurti. Cdo shfaqje e tillë cënon konsumin" tha Rama.

Kryeministri Edi Rama përsëriti ftesën për dialog për PD-në dhe LSI-në, por jo për të negociuar rregullat e demokracisë. "Ata e morën pushtetin, pasi PS-ja luftoi vetveten, ata nuk kanë asnjë shans asnjëherë që të bëhen shumicë, aq më tepër sot, kur shumica është kompakte, na duhet vetëm qetësi. Ka të rinj që kanë ardhur sot dhe do të vijojnë që të vijnë, cka do të thotë se këta nuk janë e vetmja zgjidhje. Ne duhet të bëjmë cdo ditë reflektimin tonë se cfarë nuk shkon dhe cfarë duhet të bëjmë më mirë. Ne jemi gjithmonë gati të flasim, dora jonë është e shtrirë, gatishmëria jonë është gjithmonë për të dialoguar për gjithcka, por nuk jemi gati që të negociojmë rregullat themelore që bëjnë ndryshimin mes këtij sistemi dhe cdo sistemi tjetër" tha Rama.

Kreu i qeverisë u shpreh se me largimin e PD-së dhe LSI-së nga Kuvendi, shumica do të vijojë që të dialogojë me opozitën e re, që janë deputetët që pranuan të marrin mandatet për të cuar përpara reformat që kërkon Brukseli. "Është koha që shqiptarët të shohin që ata nuk janë e vetmja zgjidhje e zgjedhje, ka të tjerë, ata që kanë ardhur e vazhdojnë të vijnë aq sa të vijnë. Tani me opozitën e re këtu në parlament do ta cojmë përpara reformën zgjedhore. Nuk do të shkojmë në Bruksel të themi nuk e bëjmë dot këtë, se ata ikën, këtë nuk e bëjmë dot, ne do të gjejmë rrugën të dialogojmë me opozitën që do të zerë vendet këtu në sallë dhe bazuar mbi rekomandimet e OSBE-së dhe do të shkojmë përpara, ashtu si me votën e emigrantëve" tha Rama.

Kryeministri Rama u shpreh sot se zgjedhjet lokale do të zhvillohen me apo pa opozitën, ndërsa shtoi se PS-ja do t'i fitojë të gjitha bashkitë. "Në qershor Shqipëria ka zgjedhje vendore, ata e dinë se nuk ka asnjë shans, e dinë ju se ua kanë thënë në kafenenë e parlamentit, e di edhe unë se e kam dëgjuar nga partia e tretë e opozitës. Kanë shumë pak shanse që të ruajnë bashkitë që kanë. Ne na takon të marrim të gjitha bashkitë, që të qeverisen nga njerëz normalë që dine të bëjnë zhvillim dhe dinë që të ndryshojnë faqen e historisë së një komuniteti. Nuk duan që ti marrim të gjitha, bujrum le të vijnë dhe të shohin ku jemi" tha Rama.

Rama u shpreh se opozita kërkon pushtet në tavolinë, por një gjë e tillë nuk do të ndodhë, pasi u provua para dy viteve. "Këta kërkojnë që të marrin pushtet në tavolinë, atë që ne nuk ua japim dot, përmbysjen e rregullave të lojës dhe transformimin e një procesi absurd. Opozita kur e shesh që nuk fiton zgjedhjet, thotë iki duke djegur mandatet dhe anulim loje. Ne e provuam me ata, ua dhamë të gjitha, e di mirë Lulëzimi. Që nga dita kur u bë qeveria nuk shkela asnjë ditë në këshillin e ministrave dhe qeverinë e drejtoi zv/ ministrja dhe unë isha në fushatë. Ne vijojmë edhe më shumë vëmendje" tha Rama.

Kryeministri Rama u shpreh se pavarësisht protestës së opozitës zgjedhje të parakohshme nuk ka, ndërsa shtoi se në krah të Bashës qëndrojnë njerëz që kanë humbur miliona nga industria e bixhozit që është mbyllur. "Jemi të gjithë dëshmitarë se cfarë opozite kemi pasur, një grusht njerëzisht, pa ide, program, apo përgjegjësi për të përfaqësuar ata që i sollën këtu, jo për të demonstruar muskujt dhe për të dhënë shfaqje të shëmtuara.

E keni parasysh se e gjitha degradoi në një situatë të pa pranueshme nga asnjë normë dhe sot ne jemi këtu në kushtet kur ata janë larguar një pjesë tjetër e opozitës ka zgjedhur dhe po zgjedhin që të vijnë dhe është e drejta e tyre. Por ajo që ne na takon është që këtij kuvendi ti japim përmasën e halleve, probleme dhe pritshmërisë së njerëzve dhe nga Kuvendi të dëgjojnë se cfarë bëjmë ne dhe pse ne zgjedhim të kalojmë këto ligje dhe cilat janë idetë tona.

Cfarë do të ndodhë me ata që . Përsa na takon ne, jemi këtu për të vijuar punën tonë. Ky parlament është vendi kuna ka sjellë shumica e shqiptarëve dhe na besuar të qeverisim deri në 2021. Ne me mandatin nuk luajmë bixhozh sikur luajnë ata, që pas tyre qëndrojnë grupe interesash që janë mundur, nga bixhozi dhe të tjerët. Një që humbi miliona nga industria e bixhozit qëndronte në krah të liderit të opozitës, apo një drejtor i lojërave të fatit është atje. Lëvizja e tyre nuk i bën dot asgjë PS-së dhe qeverisë, zero" tha Rama.