Kallëzimi i PD për atentatin e Doshit 
Pushohet hetimi për Tahirin e Didin

TIRANE - Dy muaj kohë i janë dashur Prokurorisë së Përgjithshme për të konkluduar me mbylljen e hetimeve ndaj ministrit të Brendshëm Sajmir Tahiri dhe ish-drejtorit të Përgjithshëm të Policisë së Shtetit Artan Didi, akuzuar nga Partia Demokratike për shpërdorim detyre dhe veprime që pengojnë zbulimit e të vërtetës. 

Këta dy vepra, sipas kallëzimit, Tahiri dhe Didi i kanë konsumuar, pas takimit me Durim Bami në ambientet e Ministrisë së Brendshme dhe nuk kanë kryer asnjë hetim konkrete për pretendimet e tij se ishte vrasës me pagesë dhe ishte porositur për të ekzekutuar deputetët Tom Doshi dhe Mhill Fufi.

Prokuroria thotë se nga verifikimet e kryera, rezulton se këto pretendime nuk qëndrojnë pasi në asnjë rast Durim Bami nuk ka pranuar të bëjë kallëzim apo të bashkëpunojë me Policinë e Shtetit për të zbardhur pretendimet e tij. 
Në vendimin e mos fillimit të ndjekjes penale, prokurorët thonë, se Policia e Shtetit ka kryer verifikimet e nevojshme në kohën kur Bami ka takuar ministrin Tahiri dhe ish-drejtorin Didi dhe rezultuan të pavërteta deklarimet e 36-vjeçarit. Po të njëjtin qëndrim, të inskenimit dhe sajimit të komplotit të vrasjes, hetuesit thonë, kanë mbajtur edhe prokurorët e çështjes të cilët po hetojnë deputetët Tom Doshi, Mark Frroku dhe Durim Bami. 

Ky vendim i mosfillimit të ndjekjes penale ndaj Tahirit dhe Didit, mësohet se prokuroria ia ka komunikuar edhe Partisë Demokratike. Pasi ishte Sekretari i Përgjithshëm i PD-së Arben Ristani, i cili me datë 7 mars i është drejtuar Prokurorisë së Përgjithshme duke kallëzuar Tahirin dhe Didin

Redaksia Online
(Gre.M/Shqiptarja.com)

TAG:
• durim bami