Kapen porositësit e atentatit
ndaj miqve të Emiljano Shullazit

TIRANE- Në operacionin policor që ka përfshirë gjithë vendin, Policia e Tiranës ka vënë në pranga edhe dy persona, të cilët janë të dyshuar si organizator të atentatit ndaj miqve të Emiljano Shullazit. Dy djem, që sipas policisë janë kushërinj të parë me njëri-tjetrin, kanë rënë në grackën e policisë gjatë kontrolleve të ushtruara mbrëmjen e djeshme në zonën e ‘Mbikalimit të Kamzës’, Yberishtit dhe zonës së Kasharit. Ata janë gjetur të armatosur ndërsa udhëtonin së bashku në të njëjtin mjet. Policia e Shtetit, bëri të ditur mbrëmjen e djeshme se nën akuzën e organizatorëve të tentativës së vrasjes, janë prangosur Aurel dhe Amarildo Hoxhallari, që të dy lindur dhe banues në zonën e Yzberishtit.

Nga të dhënat paraprake bëhet me dije se Aurel Hoxhallari, 39 vjeç, është person i njohur për drejtësinë pasi dy vite më parë arriti të bënte spektakël me policinë teksa ndiqej që nga Lushnja e deri në Kavajë. Ai është dënuar edhe më parë për armëmbajtje pa leje, ndërsa edhe në vitin 2013 u arrestua, pasi në mjetin e tij, mbante një pistoletë tip “Glok”.

Ndërsa sipas policisë, kushëriri i tij, i moshës, 25 vjeç, nuk rezulton të jetë i skeduar, ndërkohë që nuk bëhet me dije se cili ka qenë motivi që dy kushërinjtë kanë paguar për të eliminuar Pajtim Serjanin, mbrëmjen e së hënës në rrugën e Kavajës. Në atë përballje të dhunshme me armë, u vra atentatori, Artur Baze, ndërsa u plagos rëndë efektivi i policisë, Roland Mete dhe Pajtim Serjani, i cili mori vetëm një plumb në këmbë.

Atentati
Mbrëmjen e 5 janarit Tirana u përfshi në dy ngjarje të njëpasnjëshme, që të dyja atentate, por njëra në rrugën e Kavajës dhe tjetra në Qafë-Kashar. Në të dy atentatet u sulmuan miqtë e Emiljano Shullazit dhe vetë ky i fundit, ndonëse zyrtarisht Policia e Tiranës, rrëzoi lidhjen mes dy ngjarjeve të rënda. Në rrugën e Kavajës, në një lokal, qëllohet tavolina në të cilën qëndronin katër miq të Shullazit. Një person i maskuar hyn i armatosur dhe shkreh armën mbi Pajtim Serjanin. Në tavolinë me të gjendej edhe efektivi i GOS Roland Meta, i cili pasi e ka lajmëruar atentatorin: “Ndal policia”, ky i fundit ka qëlluar mbi të dy herë. Atëherë Meta është kundërpërgjigjur duke e goditur me armën e punës.

Atentatori u gjet i vdekur rreth 1 kilometër larg vendit të krimit, ndërsa policia pasi e identifikoi viktimën, bëri me dije se dyshohet për vrasës me pagesë. Hetimet, verifikimet, lidhjet dhe një sërë provash, që policia pretendon se ka siguruar në harkun kohor të pesë ditëve, kanë nxjerrë në pah, emrat e dy kushërinjve, të cilët dyshohet se organizuan edhe sulmin me armë mbi miqtë e Shullazit. Policia e Tiranës, po edhe ajo e Shtetit, janë shumë të kujdesshme në dhënien e detajeve, pasi gjithçka pritet t’i kalojë për kompetencë prokurorisë.
 
Hetimet, Policia: Hoxhallarët organizuan vrasjen e Serjanit
Sipas të dhënave paraprake dyshohet se atentatori-viktimë i shkëmbimit të zjarrit në rrugën e Kavajës, Artur Baze, ka qenë i paguar nga dy kushërijntë Aurel dhe Amarildo Hoxhallari për të ekzekutuar Pajtim Serjanin. Policia nuk bën me dije se cili ka qenë motivi që i ka shtyrë dy djemtë për të paguar për vrasjen e mikut të Shullazit, ndërsa mësohet se emrat e dy Hoxhallarëve kanë dalë gjatë verifikimit të disa provave të sekuestruara në vendin e ngjarjes. Policia, ndonëse ka bërë të mundur arrestimin e tyre tashmë, duke i vënë edhe nën akuzë, ende nuk është mësuar asnjë e dhënë mbi autorët e atentatit ndaj Emiljano Shullazit dhe Gilmando Danit, atentat që u krye thuajse në të njëjtën kohë më ngjarjen e rrugës së Kavajës.

Shkrimi u botua në Shqiptarja.com (print) në 11 janar 2015

Redaksia Online
(d.a/shqiptarja.com)
 

TAG:
• aurel hoxhallari