Një 36-vjeçar ka ofenduar dhe kërcënuar me jetë drejtorin e Urgjencës në Spitalin e Elbasanit duke i thënë se e heq qafe me 5 mijë euro. Përplasja ka ndodhur në ambientet e urgjencës paraditen e ditës së sotme rreth orës 10:00.

Në kohën ku në të gjithë spitalet e vendit për shkak të koronavirusit është vendosur një kordon sigurie dhe fillimisht bëhet një triazhim në hyrje të urgjencës për çdo pacientë që paraqitet në mënyrë që të parandalohet përhapja e COVID-19, 36-vjeçari nuk ka respektuar këtë rregull dhe ka vendosur të kalojë këtë kordon sigurie dhe personelin e vendosur aty dhe të hyjë në korridorin e Urgjencës, me arsyetimin se do të takonte një familjar që ishte i shtruar aty. Për këtë veprim i është tërhequr vërejtje nga drejtori i urgjencës.

Në një prenoncim për Report TV, Ergys Mici, drejtori i urgjencës Elbasan u shpreh se "i ka tërhequr vëmendjen të riut duke i thënë të tregohet i kujdesshëm dhe të paraqitet në triazhim ku i bëhen disa pyetje nga personali mjekësor. Por ai nuk ka pranuar.'

Pasi iu kërkuar nga drejtoi i urgjencës ta bëntë një gjë të tillë, autori nuk pranoi dhe nisi ofendimet dhe kërcënimet me jetë duke i thënë se 'e heq qafe me 5 mijë euro'.  I riu ka tentuar dhe të gjuaj me çantë drejtorin e urgjencës në sy të personelit të sigurimit, por është ndaluar nga ky i fundit.

Tashmë ndaj 36-vjeçarit ka nisur procedimi në gjendje të lirë për kërcënimin e kryer brenda Urgjencës së Elbasanit.