Kërkesat e grekëve, krizë votash
nga mazhoranca për reformën

TIRANE- Reforma territoriale ka hapur llogaritë e votave nëse ajo mund të miratohet ose jo. Debati i fundit lidhur me mënyrën se si do të bëhet ndarja e zonave minoritare ka vënë në pikëpyetje garancinë e votave te mazhoranca. Disa prej deputetëve të PS e LSI janë me kombësi greke, gjë e cila ul numrin e votave të shumicës.

Llogaria
Aktualisht mazhoranca ka 85 vota në Kuvend. Por nga 85 vota, tre deputet janë me kombësi greke dhe përfaqësojnë interesin e minoritetit helen në Shqipëri. Fakti se PBDNJ e OMINIA kërkojnë krijimin e zonave me shumicë greke në Himarë, Livadhja e Dropull ka bërë që nga mazhoranca të lindin dyshime për këto pretendime të tyre.

Konkretisht PS e LSI kanë propozuar një ndarje territoriale që të garantohet një barazi ndërmjet popullsisë shqiptare dhe asaj greke në zonat minoritare. Për ta Himarës duhet t’i bashkëngjitet Vranishti dhe Kurveleshi, zona të cilat janë krahina Labërie. Por kjo gjë duket se nuk i shkon përshtat kërkesave që kanë përfaqësuesit e minoritetit grek në Shqipëri. Konkretisht Vangjel Dule, kreu i PBDNJ-së është edhe përfaqësuesi i OMONIA-a në Kuvend, i cili do të mbrojë pretendimet për krijimin e zonave të pastra greke në Shqipëri. Krahas tij, edhe Vangjel Tavo, deputeti i LSI-së është i zgjedhur nga krahina minoritare e Dropullit, zonë e cila gjithashtu do të dalë më vete.

Pavarësisht se ata janë në mazhorancë, fakti se qeveria mund të votoj draftin me 39/47 njësi vendore, do të çojë që tri deputetët minoritar të mos japin votën e tyre pro, pasi kërkojnë që të ketë një ndarje ndryshe të krahinave minoritare. Kësisoj nga 85 vota, mazhoranca do të shkojë me 82 vota. Gjë e cila e bën të pamundur për të votuar këtë reformë të vetme, ndaj dhe do të duhet të paktën konsensusi me deputetët e PDIU.

Çamët
Kriza e interesave ndërmjet deputetëve minoritarë grek dhe mazhorancës sjell në lojë deputetët çam. Partia Drejtësi Integrim dhe Unitet ka në përbërje të saj 5 deputet të cilët mund të bëjnë ndryshimin e votave në Kuvend. Krahas tyre edhe deputeti Nard Ndoka që është i pavarur mund të bashkohet me qeverinë për këtë nismë duke ndryshuar sërish raportin përsa i përket interesave greke mbi shtetin shqiptar. Konkretisht nga 82 deputet që mbeten nga mazhoranca për reformën, mund të shtohen edhe 6 të tjerë ku përfshihet Shpëtim Idrizi, Tahir Muhedini, Dashamir Tahiri, Aqif Rakimi, Omer Mano dhe Nard Ndoka. Ose të paktën Ndoka e Idrizi duke siguruar numrin 84, në rast të tërheqjes së tri deputetëve të njohur si përfaqësues të komuniteteve minoritare.

Shkrimi u përditësua në 25 maj 2014
(d.a/shqiptarja.com)